Deputetët e Kuvendit të Kosovës kanë miratuar formimin e Komisionit Ad-Hoc për përzgjedhjen e katër anëtarëve të Bordit të Radiotelevizionit të Kosovës (RTK), me qëllim të përfaqësimit të komuniteteve të ndryshme në këtë institucion publik.
Propozimi për formimin e këtij komisioni mori mbështetjen e 80 deputetëve, pa asnjë votë kundër dhe pa asnjë abstenim. Me këtë vendim, Kuvendi i Kosovës i hap rrugë nisjes së procedurave për përzgjedhjen e anëtarëve të rinj të Bordit të RTK-së.
Sipas vendimit të miratuar, Komisioni Ad-Hoc do të jetë përgjegjës për procesin e përzgjedhjes së dy anëtarëve shqiptarë, një anëtari nga komuniteti serb dhe një anëtari nga komunitetet jo shumicë.
Formimi i këtij komisioni përbën një hap drejt vazhdimit të procedurave institucionale për plotësimin e përbërjes së Bordit të RTK-së, duke synuar përfaqësimin e komuniteteve në përputhje me ndarjen e përcaktuar.
Burimi: Dukagjini