Disa shërbime qeveritare në Mbretërinë e Bashkuar mund të jenë përkohësisht jashtë funksionit për shkak të një problemi global të sigurisë kibernetike, ka njoftuar zyra e kryeministrit britanik, Downing Street.
Sipas njoftimit, nuk janë prekur shërbime kritike publike që përdoren nga një numër i madh qytetarësh, por disa shërbime të kufizuara mund të jenë përkohësisht jashtë linje, derisa të përfundojnë ndërhyrjet teknike. Downing Street ka theksuar se kjo nuk do të thotë se sistemet janë hakuar.
Problemi lidhet me një dobësi të sigurisë në gjuhën programuese PHP, e cila përdoret gjerësisht për funksionimin e faqeve të internetit. Organizata dhe institucione në mbarë botën po punojnë për të adresuar këtë cenueshmëri, e cila mund të prekë miliona faqe interneti.
Një studiues që ka ndihmuar në identifikimin e dobësisë e ka cilësuar atë si problemin më serioz që ka zbuluar ndonjëherë.
Ndërkohë, platforma e infrastrukturës së internetit Cloudflare ka bërë të ditur se ka regjistruar miliona tentativa sulmesh në rrjetin e saj, megjithëse nuk ka prova se ato kanë qenë të suksesshme.
Ndër institucionet dhe platformat që kanë ndërmarrë masa është Zyra për Përgjegjësinë Buxhetore e Mbretërisë së Bashkuar, e cila e ka nxjerrë faqen e saj jashtë funksionit të mërkurën. Të njëjtën masë e ka ndërmarrë edhe Shërbimi Shëndetësor Kombëtar i Skocisë (NHS Scotland).
Gjithashtu, disa pjesë të enciklopedisë online Wikipedia kanë qenë të paarritshme, ndërsa Amazon ka bërë të ditur se ka zbuluar një përpjekje të hakerëve për të shfrytëzuar dobësitë e sigurisë.
Organizatat e prekura po ndërmarrin masa për të parandaluar shfrytëzimin e kësaj cenueshmërie dhe për të mbrojtur sistemet e tyre.
Burimi: Dukagjini