Aktorja e njohur britanike dhe fituesja e çmimit “Oscar”, Judi Dench, ka treguar se përkeqësimi i një sëmundjeje të syve e ka privuar nga mundësia për të lexuar dhe për të vazhduar karrierën në film e teatër.
Dench, 91 vjeçe, ka deklaruar në një intervistë për emisionin “Today” të BBC Radio 4 se tashmë nuk është në gjendje të dalë në skenë, të interpretojë në filma apo të lexojë, për shkak të problemeve të vazhdueshme me shikimin.
Ajo u diagnostikua në vitin 2012 me degjenerimin makular të lidhur me moshën, një sëmundje që dëmton shikimin qendror dhe e vështirëson dallimin e detajeve.
Gjendja e aktores ishte përkeqësuar edhe më herët. Në vitin 2024, ajo kishte treguar për radion amerikane NPR se sëmundja po ndikonte gjithnjë e më shumë në aftësinë e saj për të punuar. Dench kishte rrëfyer gjithashtu se ndonjëherë nuk arrinte t’i njihte miqtë e vjetër kur kalonin pranë saj.
Në intervistën e fundit, aktorja tha se po përpiqet të përshtatet me kufizimet që i sjell sëmundja dhe të vazhdojë përpara. Kur u pyet për përjetimin e plakjes, ajo e përshkroi atë si “të tmerrshme”.
Judi Dench është një nga emrat më të njohur të kinematografisë britanike, me një karrierë shumëdekadëshe në film dhe teatër. Ajo fitoi çmimin “Oscar” për aktoren më të mirë në rol dytësor për interpretimin e saj në filmin “Shakespeare in Love”.
Pavarësisht vështirësive, Dench vazhdon të ndajë këshilla për profesionin dhe jetën, duke theksuar rëndësinë e guximit për të marrë role sfiduese dhe për të mos i konsideruar arritjet si të mirëqena.
Sinjali – aty ku e vërteta flet para lajmit!
Burimi: Sinjali