Një cisternë me naftë ruse është nisur drejt New Yorkut, në atë që pritet të jetë dërgesa e parë e këtij lloji drejt Shteteve të Bashkuara që nga viti 2022. Transporti vjen pas një marrëveshjeje mes presidentit amerikan, Donald Trump, dhe presidentit rus, Vladimir Putin, raporton Reuters, duke iu referuar të dhënave të transportit detar të publikuara të premten.
Cisterna Agioi Fanendes, e cila lundron nën flamurin e Maltës, u ngarkua me 40 mijë tonë naftë me përmbajtje shumë të ulët të squfurit në portin rus të Primorskut, në Detin Baltik, më 22 tetor. Sipas të dhënave të kompanisë LSEG, anija pritet të mbërrijë në SHBA më 7 nëntor.
Për momentin, nuk dihet se kush janë blerësi dhe shitësi i ngarkesës.
Trumpi e njoftoi marrëveshjen këtë muaj, në kuadër të përpjekjeve për të ulur çmimet e larta të naftës përpara zgjedhjeve të mesmandatit në SHBA, të cilat mbahen më 3 nëntor.
Si pjesë e marrëveshjes, presidenti amerikan pezulloi zbatimin e disa dispozitave të një ligji të ri amerikan për sanksionet ndaj Rusisë. Ai gjithashtu kërcënoi vendet evropiane me kufizimin e eksporteve amerikane të naftës, nëse ato nuk nxjerrin në treg më shumë karburant nga rezervat e tyre emergjente, me synimin për të ulur çmimet.
Më 9 tetor, Trumpi deklaroi se Rusia do të eksportonte menjëherë 300 mijë tonë naftë dizel, apo rreth 2.25 milionë fuçi, drejt SHBA-së dhe tregjeve ndërkombëtare. Sipas tij, në nëntor do të dërgoheshin edhe 500 mijë tonë, ndërsa një milion tonë të tjerë do të pasonin më vonë.
Importet amerikane të naftës dhe produkteve të naftës nga Rusia u ndaluan në vitin 2022, gjatë administratës së ish-presidentit Joe Biden, pas nisjes së luftës ruse në Ukrainë.
Ndërkohë, që nga shkurti i vitit 2023, kur Bashkimi Evropian vendosi embargo ndaj importeve ruse të produkteve të naftës, Rusia i ka orientuar eksportet kryesisht drejt Turqisë, Brazilit dhe vendeve afrikane. Ajo furnizon gjithashtu vendet e Azisë Qendrore përmes transportit hekurudhor.
Sinjali – aty ku e vërteta flet para lajmit!
Burimi: Sinjali