“Jashtëzakonisht unë e vlerësoj këtë unitet, sepse për bashkimin e forcave politike për të pasur sa më shumë përfaqësues në Parlamentin e Serbisë ka një peshë dhe një vlerë të madhe. Andaj, me të dielën, me 25 tetor, unë ftoj të gjithë qytetarët e Luginës së Preshevës kudo që janë, qoftë që janë këtu, qoftë ata që gjenden në Republikën e Kosovës ose edhe në diasporë, të vijnë masivisht edhe të shprehin vullnetin e tyre të lirë demokratik dhe për të çuar mesazhin e tyre për të përfaqësuar denjësisht, për të pasur përfaqësues të denjë në Parlamentin e Serbisë, për të mbrojtur të drejtat tona, për të afirmuar pozitën tonë dhe për të sensibilizuar gjendjen dhe pozitën aktuale me të cilën përballemi, duke e ditur se me çfarë diskriminimi, me çfarë shkelje sistematike dhe me çfarë shpërngulje masive jemi duke u përballur” , ka thënë Ardita Sinani, kryetare e Preshevës.
Pjesëmarrja e lartë shihet si mundësi për të fuqizuar zërin e shqiptarëve dhe për të ngritur çështjet që vazhdojnë t’i preokupojnë ata.
“Këto zëra që do të jenë në Parlamentin e Serbisë do të jenë zëra të fuqishëm që do t’i kontribuojnë çështjes kombëtare apo të drejtave elementare që i takojnë pakicës kombëtare shqiptare që jetojnë në Serbi. Pra, është e domosdoshme të jemi bashkë, është e domosdoshme t’i japim fuqinë maksimale që e ka elektorati ynë në Luginë të Preshevës, gjithashtu edhe në Sanxhak, ku për herë të parë në Sanxhak është edhe një kandidate nga Sanxhaku, një shqiptare kandidate nga Sanxhaku. Dhe mendoj që ne duhet fuqishëm të mbizotërojmë, të dalim në vota dhe të fitojmë ato që i meritojmë”, ka thënë Enkel Rexhepi, kryetar u Këshillit Kombëtar Shqiptar.
Mosnjohja e diplomave të Kosovës, pasivizimi i adresave dhe mungesa e investimeve janë ndër problemet kryesore të shqiptarëve në Luginë. Përfaqësimi institucional dhe bashkërendimi politik konsiderohen të rëndësishëm për adresimin e tyre.
“Koalicioni Shqiptar me numër 17 tashmë këtë bashkim e kanë shpërndarë në Preshevë, Bujanoc e Medvegjë e madje në çdo lagje, në çdo shtëpi. Mobilizimi i shqiptarëve është në nivelin më të lartë në mënyrë që t’i japim përgjigje Serbisë, t’i japim përgjigje Vuçiqit për diskriminimin që po u bën shqiptarëve të Luginës së Preshevës”, ka thënë Ragmi Mustafi, këshilltar i kryeministrit të Kosovës.
Në këtë proces zgjedhor, mobilizimi i qytetarëve dhe unifikimi i përfaqësimit shqiptar mbeten ndër synimet kryesore, me pritjen që kërkesat e tyre të marrin më shumë vëmendje në institucionet e Serbisë.
Burimi: RTKLive