Partia Socialiste e Serbisë (SPS) nuk arriti të kalonte pragun zgjedhor prej tre për qind në zgjedhjet e parakohshme parlamentare.
Sipas vlerësimeve fillestare të rezultateve të përgjithshme, partia siguroi vetëm 2,3 për qind të votave, çka do të thotë se, për herë të parë që nga viti 1990, ajo nuk do të ketë asnjë përfaqësues në Kuvendin e Serbisë.
Ky është rezultati më i dobët që SPS-ja ka arritur ndonjëherë në zgjedhjet parlamentare që nga vendosja e sistemit shumëpartiak.
Nëse konfirmohet shifra prej 2,3 për qind, kjo do të përbënte një rënie të mbështetjes prej 4,25 pikësh përqindjeje krahasuar me zgjedhjet e vitit 2023. Në krahasim me vitin 2022, rënia është edhe më drastike, duke arritur në 9,14 pikë përqindjeje.
Në zgjedhjet e vitit 2023, SPS-ja mori 6,55 për qind të votave dhe 18 mandate, ndërsa një vit më parë kishte marrë 11,44 për qind, duke siguruar 31 vende në parlament.
Lista e Studentëve doli fituese në zgjedhjet e parakohshme të sotme në Serbi. Parashikimet fillestare tregojnë se “Lista e Studentëve – Studentët Fitojnë”, siguroi 52 për qind të votave ose 138 mandate. Në vendin e dytë renditet lista “Serbia e Bashkuar” me 39,3 për qind të votave ose 104 mandate.