Sipas agjencisë Reuters, Nuñez tha se demonstratat e planifikuara për 31 tetor mund të shoqërohen sërish me incidente, pavarësisht operacionit të gjerë të sigurisë që ndihmoi në kufizimin e dhunës gjatë protestave të së shtunës.
Autoritetet angazhuan rreth 70 mijë policë dhe pjesëtarë të xhandarmërisë në mbarë vendin, ndërsa ministri bëri të ditur se gjatë demonstratave u arrestuan 1.435 persona.
Protestat janë nxitur nga rritja e kostos së jetesës dhe pakënaqësitë me shërbimet publike. Lëvizja, e cila fillimisht u përqendrua te kërkesat e studentëve për përmirësimin e kushteve në arsim, është zgjeruar duke përfshirë sindikata dhe aktivistë të lëvizjes së “Jelekëve të Verdhë”.
Sipas të dhënave të Ministrisë së Brendshme, rreth 410 mijë persona morën pjesë në protestat e së shtunës, ndërsa sindikatat vlerësuan se numri i pjesëmarrësve ishte rreth 800 mijë.
Megjithëse shumica e marshimeve u zhvilluan pa incidente të mëdha, përleshje u regjistruan në Paris, Marsejë dhe Lion, si dhe në disa qytete të tjera.
Zëdhënësja e qeverisë, Maud Bregeon, tha se kërkesat e protestuesve duhet të dëgjohen, por theksoi se rikthimi i qetësisë është kusht për zhvillimin e dialogut.
Ndërkohë, qeveria pritet të shpallë masa për adresimin e shqetësimeve të studentëve lidhur me arsimin dhe pranimin në universitete.
Burimi: RTKLive