Reperi Nicki Minaj është shfaqur përkrah presidentit amerikan Donald Trump në një tubim në Michigan, ku ky i fundit komentoi publikisht për pamjen e saj fizike, ndërsa një postim nga drejtori i komunikimit të Shtëpisë së Bardhë nxiti spekulime për një rol të mundshëm të këngëtares në administratë.
Minaj mori pjesë në tubim për të shprehur mbështetjen e saj për Trumpin dhe kandidatët republikanë përpara zgjedhjeve të ardhshme të mesmandatit.
Gjatë fjalimit, Trump tërhoqi vëmendjen te këngëtarja, e cila ishte ulur në audiencë, duke komentuar për të pasmet e saj.
“Meqë ra fjala, shikoni çfarë vithe të mira ka… Nicki Minaj. Është e vështirë të mos e vëresh këtë”, tha Trump, duke shkaktuar duartrokitje nga të pranishmit.
Më pas, ai e ftoi Minajn të ngrihej në këmbë dhe shtoi se shpresonte që ajo të mos ishte ofenduar nga komenti, duke theksuar se e vlerësonte mbështetjen e saj.
Më vonë, këngëtarja iu bashkua Trumpit në skenë, ku foli për mbështetjen e saj ndaj presidentit dhe u bëri thirrje votuesve në Michigan që të mbështesin kandidatët republikanë.
Spekulimet për një rol në Shtëpinë e Bardhë
Vëmendje të veçantë mori edhe një video e publikuar nga Steven Cheung, drejtor i komunikimit në Shtëpinë e Bardhë, gjatë udhëtimit të Minajt me aeroplanin presidencial Air Force One drejt Michiganit.
Cheung e shoqëroi videon me mesazhin se mund të kenë gjetur një zëdhënëse të re. Minaj iu përgjigj publikimit me një flamur amerikan dhe një emoji.
Megjithatë, deri më tani nuk ka konfirmim zyrtar se këngëtares i është ofruar ndonjë pozitë në administratën Trump.
Sipas raportimit, spekulimet vijnë në një kohë kur pozita e zëdhënëses së Shtëpisë së Bardhë është pa një emëruese të përhershme, pas largimit të Katie Zacharia, vetëm pesë ditë pasi kishte marrë detyrën.
Minaj, ndërkohë, është përfshirë gjithnjë e më hapur në politikën amerikane dhe ka shprehur publikisht mbështetjen e saj për Trumpin dhe kandidatët republikanë.
Sinjali – aty ku e vërteta flet para lajmit!
Burimi: Sinjali