Skuadra prizrenase, Liria po kalon një formë fantastike nën drejtimin e trajnerit Ismet Munishi, me gjashtë ndeshje radhazi pa pësuar gol në Ligën e Parë dhe vetëm katër gola të pranuar në 11 ndeshje kampionale.
Liria e Prizrenit po dëshmon se rikthimi në Superligën e Kosovës është objektiv që synohet me seriozitet të madh. Skuadra e drejtuar nga Ismet Munishi po ndërton suksesin mbi një mbrojtje që është kthyer në mur të pakalueshëm për kundërshtarët.
Gjashtë ndeshjet e fundit flasin më së miri për formën e prizrenasve, të cilët në asnjërën prej tyre nuk kanë pranuar gol. Gjatë kësaj periudhe, Liria ka regjistruar pesë fitore dhe një barazim, duke treguar siguri në mbrojtje dhe efikasitet në sulm.
Seria nisi me fitoren 1-0 ndaj 2 Korrikut, për të vazhduar me triumfin identik kundër Ramiz Sadikut. Pas barazimit pa gola ndaj Dinamo Ferizajt, Liria mposhti Trepçën me rezultat 1-0, ndërsa më pas shënoi fitore bindëse ndaj Kikës (4-0) dhe Lepencit (4-0).
Pesë futbollistë, baza e mbrojtjes së fortë
Një meritë të veçantë për këtë ecuri kanë futbollistët që përbëjnë boshtin e repartit mbrojtësi. Flamur Gashi në portë, Eldonit Shaqiri dhe Elom Nya-Vedji në krahët e mbrojtjes, si dhe Muhamed Useini e Arbër Prekazi në qendër, kanë qenë titullarë në thuajse secilën ndeshje.
Koordinimi mes portierit dhe mbrojtësve ka bërë që Liria të jetë skuadra me mbrojtjen më të mirë në ligë, duke pranuar vetëm katër gola në 11 ndeshje të zhvilluara.
Munishi ndërton një skuadër me objektiv të qartë
Nën drejtimin e Munishit, Liria ka regjistruar tetë fitore, dy barazime dhe vetëm një humbje në 11 ndeshje kampionale. Këto rezultate e dëshmojnë vazhdimësinë e skuadrës, e cila po kombinon organizimin mbrojtës me forcën sulmuese.
Me një mbrojtje që vështirë të thyhet dhe një skuadër që po fiton javë pas jave, prizrenasit po dërgojnë sinjale të qarta për synimet e tyre këtë sezon.
Objektivi është i vetëm: rikthimi në Superligën e Kosovës. Për ta arritur këtë, Liria po mbështetet në një formulë që deri më tani po funksionon – disiplinë, organizim dhe një mbrojtje që prej gjashtë ndeshjesh nuk njeh gol të pësuar. /Telegrafi/