Kryetari i Bashkisë së Shkupit, Orce Gjorgievski, sot në një konferencë për shtyp dha raport mbi punën e bërë gjatë vitit të kaluar, gjatë së cilës foli për gjendjen financiare të Bashkisë, projektet infrastrukturore, transportin publik, higjienën komunale dhe mbrojtjen e mjedisit.
Ai theksoi se borxhet e Bashkisë dhe ndërmarrjeve publike janë ulur, se po zbatohen disa projekte kapitale dhe njoftoi investime të reja në infrastrukturën e trafikut, gjelbërimin dhe shërbimet publike.
“Një vit më parë, duke qëndruar këtu, para jush, u zotova se do ta ndryshonim Shkupin e shkatërruar në të cilin jetonim të gjithë. Se do ta ndalonim rënien e tij. Se do ta bënim përsëri një qytet të fortë, dinjitoz dhe, mbi të gjitha, krenar. Ju premtova punë dhe vepra. Sot jam përsëri para jush, për të dhënë llogari për atë premtim”.
“Ne punuam shumë. Punuam ditë e natë. Me dijeninë se pas çdo problemi të pazgjidhur qëndrojnë njerëz, jeta e të cilëve mezi pret që të vijnë kohë më të mira. Detyra jonë ishte të krijonim ato kohë më të mira. Ne e dinim rëndësinë e detyrës. Ne nuk u tërhoqëm nga përgjegjësia jonë”.
“Sepse ka momente kur një qytet duhet të vendosë nëse do të vazhdojë të mësohet me rënien e vet apo të mbledhë forcë dhe të qëndrojë në këmbët e veta. Ne vendosëm të ngrihemi. Të merremi me pjesën më të vështirë. Të hapim çështjet që janë shtyrë për shumë kohë. Dhe të vazhdojmë aty ku çdo anulim i ri do të thoshte një tjetër shpresë e humbur për qytetarët tanë”, tha Gjorgjievski.
Ai foli edhe për temat tjera për të cilat tha se ka investuar gjatë periudhës sa ai është në krye të Bashkisë së Shkupit./Telegrafi/