Urina e errët, jashtëqitja e zbehtë dhe disa simptoma që shpesh kalojnë pa u vënë re mund të tregojnë çrregullime të mëlçisë ose të rrugëve biliare. Por si të dallohen ndryshimet e zakonshme nga ato që kërkojnë kontroll mjekësor?
Ngjyra e urinës mund të japë informacione të rëndësishme për gjendjen shëndetësore, përfshirë edhe funksionimin e mëlçisë. Ndonjëherë, ndryshimi i saj është ndër shenjat e para të dukshme të një çrregullimi, madje përpara se të shfaqen simptoma të tjera.
Megjithatë, jo çdo urinë e errët, me shkumë apo me erë të pazakontë lidhet me sëmundjet e mëlçisë. Dehidratimi, ushqimet, barnat dhe infeksionet urinare janë ndër shkaqet e tjera të mundshme.
Mëlçia merr pjesë në përpunimin e lëndëve ushqyese, metabolizimin e barnave, prodhimin e proteinave të rëndësishme dhe krijimin e tëmthit, i cili ndihmon tretjen e yndyrave. Kur këto procese çrregullohen, ndryshimet mund të vërehen edhe gjatë urinimit.
Kur urina e errët mund të tregojë probleme me mëlçinë?
Një nga ndryshimet që meriton vëmendje është urina që merr ngjyrë portokalli të errët ose kafe, veçanërisht kur i ngjan çajit të fortë apo birrës së errët.
Kjo mund të ndodhë për shkak të bilirubinës, pigment që krijohet gjatë shpërbërjes normale të qelizave të kuqe të gjakut.
Në kushte normale, mëlçia e përpunon bilirubinën dhe mundëson largimin e saj përmes tëmthit. Por gjatë hepatitit, dëmtimit të qelizave të mëlçisë ose bllokimit të rrugëve biliare, bilirubina e konjuguar mund të kalojë në urinë dhe t’ia ndryshojë ngjyrën.
Sipas MedlinePlus, prania e bilirubinës në urinë mund të jetë shenjë e hershme e sëmundjeve të mëlçisë.
Megjithatë, urina e verdhë e errët më shpesh lidhet me mungesën e lëngjeve. Nëse ngjyra mbetet shumë e errët pavarësisht hidratimit të mjaftueshëm, nevojitet vlerësim mjekësor.
Urina e errët dhe jashtëqitja e zbehtë: Kombinimi që kërkon vëmendje
Kur urina bëhet e errët, ndërsa jashtëqitja merr ngjyrë shumë të çelët, gri ose pothuajse të bardhë, mund të bëhet fjalë për pengesë në qarkullimin e tëmthit.
Në këto raste, pigmentet biliare nuk arrijnë në zorrë në sasinë e zakonshme, duke ndryshuar ngjyrën e jashtëqitjes.
Mund të shfaqen edhe zverdhja e lëkurës dhe e të bardhave të syve, kruarja, të përzierat dhe humbja e oreksit.
Shërbimi Shëndetësor Kombëtar britanik, NHS, thekson se verdhëza kërkon vlerësim të shpejtë mjekësor, pasi mund të lidhet me sëmundje të mëlçisë ose pengesa në rrugët biliare.
foto: westend61
A është urina me shkumë shenjë e dëmtimit të mëlçisë?
Shfaqja e herëpashershme e shkumës zakonisht nuk është shqetësuese. Ajo mund të krijohet nga rrjedha e fuqishme e urinës.
Megjithatë, nëse shkuma është e dendur dhe shfaqet vazhdimisht, mund të tregojë praninë e proteinave në urinë, gjendje e njohur si proteinuri.
Kjo lidhet kryesisht me çrregullimet e veshkave dhe nuk konsiderohet shenjë karakteristike e sëmundjeve të mëlçisë.
Sipas National Kidney Foundation, urina vazhdimisht me shkumë duhet të kontrollohet, veçanërisht kur shoqërohet me ënjtje të këmbëve ose qepallave.
Era e rëndë dhe djegia gjatë urinimit: Çfarë tregojnë?
Era e pakëndshme e urinës zakonisht lidhet me dehidratimin, ushqime të caktuara, barna ose infeksione urinare.
Edhe djegia dhe dhimbja gjatë urinimit janë më karakteristike për infeksionet ose irritimin e rrugëve urinare sesa për dëmtimin e mëlçisë.
Urinimi i shpeshtë, sidomos në sasi të vogla, mund të lidhet me probleme të fshikëzës urinare dhe gjendje të tjera që kërkojnë vlerësim të veçantë.
Cilat simptoma të tjera paralajmërojnë probleme me mëlçinë?
Sëmundjet e mëlçisë mund të zhvillohen për një kohë të gjatë pa simptoma të qarta. Kur shfaqen, ato mund të përfshijnë lodhje të vazhdueshme, mungesë oreksi, të përziera, kruarje të lëkurës, ënjtje të barkut ose këmbëve dhe shfaqje të lehtë të mavijosjeve.
Këto shenja nuk nënkuptojnë domosdoshmërisht sëmundje të mëlçisë, por kërkojnë kontroll.
Cilat analiza tregojnë nëse mëlçia funksionon siç duhet?
Për vlerësimin e mëlçisë, mjeku mund të rekomandojë matjen e bilirubinës, ALT, AST, GGT dhe fosfatazës alkaline (ALP).
Albumina dhe parametrat e koagulimit ndihmojnë në vlerësimin e funksionit të saj, ndërsa ultrazëri abdominal mund të zbulojë ndryshime strukturore ose probleme të rrugëve biliare.
Ngjyra e urinës mbetet vetëm një tregues i mundshëm, jo metodë diagnostikuese.
Nëse urina e errët shoqërohet me verdhëz ose jashtëqitje shumë të zbehtë, kontrolli mjekësor nuk duhet shtyrë. Shfaqja e konfuzionit ose përgjumjes së theksuar, veçanërisht bashkë me verdhëzën, kërkon ndihmë urgjente mjekësore. /Telegrafi/