Christine Lagarde do të japë dorëheqje nga posti i presidentes së Bankës Qendrore Evropiane (BQE) më 7 shkurt 2027, rreth nëntë muaj para përfundimit të mandatit të saj tetëvjeçar, ka njoftuar të enjten BQE-ja.
Vendimi u bë publik në kohën kur institucioni po përgatitej të shpallte vendimin e fundit për normat e interesit. Sipas njoftimit, Lagarde e ka informuar për vendimin e saj Këshillin Drejtues të BQE-së, i cili përcakton normat e interesit për eurozonën, si dhe presidentin e Këshillit Evropian, Antonio Costa.
BQE-ja nuk ka dhënë ndonjë arsye për largimin e saj të parakohshëm nga detyra.
“Këshilli Drejtues e falënderoi ngrohtësisht Presidenten Lagarde dhe e duartrokiti gjatë”, thuhet në deklaratën e bankës.
Ndërkohë, presidenti i Këshillit Evropian, Antonio Costa, e ka falënderuar Lagarde për shërbimin dhe përkushtimin e saj në krye të Bankës Qendrore Evropiane, detyrë të cilën ajo e mban që nga nëntori i vitit 2019.
“Për të siguruar një tranzicion të qetë drejt udhëheqjes së ardhshme të BQE-së, procesi për emërimin e pasardhësit të saj do të fillojë sot dhe do të vazhdojë pa vonesë”, tha Costa.
Pasardhësi i Lagarde do të emërohet nga Këshilli Evropian, ku bëjnë pjesë udhëheqësit e vendeve anëtare të Bashkimit Evropian.
Sipas rregullave të BE-së, presidenti i BQE-së emërohet me shumicë të kualifikuar votash, pas një rekomandimi nga ministrat e financave të vendeve anëtare dhe konsultimeve me Parlamentin Evropian dhe Këshillin Drejtues të Bankës Qendrore Evropiane.
Sinjali – aty ku e vërteta flet para lajmit!
Burimi: Sinjali