Kolektivi për Mendim dhe Veprim Feminist ka njoftuar se protesta kombëtare kundër vrasjes së grave do të vazhdojë edhe sot, duke filluar nga ora 16:00, në sheshin “Zahir Pajaziti” në Prishtinë.
Përmes një njoftimi drejtuar mediave, kolektivi ka bërë të ditur se protestat nuk do të ndalen deri në përmbushjen e kërkesave të tyre dhe deri në vendosjen e drejtësisë për Arlindën dhe të gjitha gratë e vrara.
Në reagimin e tyre, aktivistet kanë kritikuar ministren Donika Gërvalla dhe ministrin Xhelal Sveçla, duke deklaruar se qëndrimet e tyre ua kanë bërë të qartë se kërkesat e protestuesve nuk janë dëgjuar dhe nuk pritet të përmbushen.
“Ne nuk ndalemi deri kur drejtësia për Arlindën e për të gjitha gratë e vrara të vihet në vend”, thuhet në njoftimin e kolektivit.
Tutje, organizatorët kanë theksuar se do të vazhdojnë të protestojnë sot dhe në ditët në vijim, në rrugë dhe para institucioneve, për të kërkuar drejtësi dhe përmbushjen e kërkesave të tyre.
Protesta e sotme do të mbahet në orën 16:00, në sheshin “Zahir Pajaziti” në Prishtinë. /Telegrafi/