Kur ChatGPT u shfaq në fund të vitit 2022, shumëkush parashikoi se motorët tradicionalë të kërkimit në internet do ta humbnin gradualisht rëndësinë. Por, katër vjet më vonë, Google po dëshmon të kundërtën.
Kompania ka regjistruar rritjen më të shpejtë të numrit të kërkimeve në pesë vjetët e fundit, ndërsa paradoksalisht, një pjesë të këtij suksesi ia atribuon pikërisht inteligjencës artificiale, e cila fillimisht shihej si kërcënimi kryesor për biznesin e saj.
Sipas rezultateve financiare të Alphabet për tremujorin e tretë të vitit 2026, të ardhurat nga kërkimi në Google dhe shërbimet e ndërlidhura janë rritur për 12 për qind, duke arritur në 63.35 miliardë dollarë.
Drejtori ekzekutiv i kompanisë, Sundar Pichai, ka theksuar se funksionet e inteligjencës artificiale po i nxisin përdoruesit të bëjnë më shumë kërkime, përfshirë edhe ato që lidhen me blerjen e produkteve dhe shërbimeve.
Megjithatë, rritja e numrit të kërkimeve nuk po përkthehet automatikisht në të ardhura më të mëdha. Pavarësisht rezultateve pozitive, të ardhurat nga kërkimi kanë mbetur nën pritjet e analistëve, të cilët parashikonin rreth 65 miliardë dollarë.
Sfida kryesore për Google mbetet monetizimi i kërkimeve të bazuara në inteligjencën artificiale, pasi kompania ende nuk ka arritur të përfitojë prej tyre në të njëjtën mënyrë si nga rezultatet tradicionale të kërkimit.
Funksioni AI Mode, i cili u ofron përdoruesve përgjigje përmes bisedave me inteligjencën artificiale, ka ndryshuar edhe mënyrën e shfaqjes së reklamave dhe mundësitë për të gjeneruar të ardhura.
Philipp Schindler, drejtori i biznesit në Google, ka konfirmuar se AI Mode aktualisht gjeneron më pak të ardhura nga reklamat, duke ndikuar në ritmin e rritjes financiare të kompanisë.
Përballë kësaj sfide, Google po zgjeron gradualisht praninë e reklamave në funksionet AI Mode dhe AI Overviews, ndërsa kompania pretendon se eksperimentet e deritanishme kanë dhënë rezultate premtuese.
Kështu, inteligjenca artificiale nuk duket se po i largon përdoruesit nga Google. Përkundrazi, sipas të dhënave të kompanisë, ajo po i shtyn ata të kërkojnë edhe më shumë.
Tashmë, sfida më e madhe për gjigantin amerikan nuk është si t’i mbajë përdoruesit në platformë, por si të fitojë para nga mënyra e re se si ata kërkojnë informacione në internet.
Sinjali – aty ku e vërteta flet para lajmit!
Burimi: Sinjali