Së paku shtatë emigrantë kanë humbur jetën në ujërat afër Ishujve Kanari të Spanjës, ndërsa mbi 380 të tjerë janë shpëtuar nga shërbimet e shpëtimit detar.
Sipas autoriteteve spanjolle, dy trupa të pajetë u gjetën në një barkë emigrantësh, nga e cila u shpëtuan 132 persona, rreth 150 kilometra larg ishullit Lanzarote. Pesë emigrantë të tjerë, të cilët kishin vdekur gjatë udhëtimit, ishin hedhur në det.
Ndërkohë, 250 emigrantë të tjerë u shpëtuan nga ekipet e rojës bregdetare pranë ishujve Lanzarote dhe El Hierro. Një ditë më parë, 107 persona të tjerë ishin shpëtuar pranë ishullit El Hierro, raporton Reuters.
Presidenti i Ishujve Kanari, Fernando Clavijo, ka reaguar pas tragjedisë, duke thënë se rruga e Atlantikut po vazhdon të marrë jetë njerëzish.
Rruga detare nga Afrika Perëndimore drejt Ishujve Kanari konsiderohet ndër më të rrezikshmet në botë. Çdo vit, mijëra emigrantë përpiqen ta kalojnë oqeanin me barka të mbingarkuara, duke rrezikuar jetën për të arritur në territorin spanjoll.
Edhe pse numri i emigrantëve që kanë mbërritur këtë vit është më i ulët krahasuar me periudhën e njëjtë të vitit të kaluar, gjatë muajit tetor është shënuar rritje e ndjeshme e udhëtimeve, duke shtuar presionin ndaj shërbimeve të pritjes dhe emergjencës në ishuj.
Sinjali – aty ku e vërteta flet para lajmit!
Burimi: Sinjali