Shërbimet hekurudhore në linjën Madrid–Sevilje do të reduktohen pas aksidentit të javës së kaluar, ku humbën jetën 69 persona pranë qytetit Urda, në Spanjën qendrore.
Kufizimet do të mbeten në fuqi derisa Agjencia Spanjolle e Sigurisë Hekurudhore të shqyrtojë sistemin e sigurisë së linjës dhe të përfundojë zbatimi i vonuar i Sistemit Evropian të Menaxhimit të Trafikut Hekurudhor (ERTMS).
Ky është aksidenti i dytë i rëndë gjatë këtij viti në të njëjtën linjë. Në janar, një tjetër aksident, ku u përfshinë të njëjtat kompani, la të vdekur 46 persona.
Ministri i Transportit, Oscar Puente, ka përjashtuar dorëheqjen, ndërsa pritet të përballet me pyetjet e ligjvënësve për menaxhimin e tragjedisë, e cilësuar si aksidenti më i rëndë hekurudhor në Evropë që nga viti 2013.
Ndërkohë, qeveria e kryeministrit Pedro Sanchez, e cila synon rizgjedhjen më 29 nëntor, ka miratuar një paketë ndihme emergjente për viktimat dhe familjet e tyre. Masat përfshijnë dyfishimin e pagesave nga sigurimi i detyrueshëm i pasagjerëve, përshpejtimin e kompensimeve dhe përmirësimin e mbulimit për paaftësinë e përkohshme.
Puente ka prezantuar edhe masa shtesë sigurie. Mes tyre është kufizimi i shpejtësisë në 40 kilometra në orë kur sinjalistika dështon dhe drejtuesi i trenit duhet të mbështetet në vëzhgimin e drejtpërdrejtë për të dalluar pengesat në shina. Gjithashtu, parashikohet shtimi i stafit dhe përmirësimi i kushteve në qendrat e kontrollit hekurudhor.
Qeveria është zotuar të përshpejtojë shtrirjen e ERTMS-së në të gjithë rrjetin hekurudhor. Sipas kontratave qeveritare, zbatimi i këtij sistemi të standardizuar evropian të sigurisë dhe sinjalizimit ka mbetur prapa afatit në linjën ku ndodhën dy aksidentet.
Burimi: Dukagjini