Barcola ishte transferuar nga Paris Saint-Germaini te Liverpooli për shumën prej 125 milionë eurosh, duke u konsideruar pasuesi i Salahut, i cili për nëntë vjet ishte një prej figurave kryesore të skuadrës nga “Anfield”.
Megjithatë, 24-vjeçari ende nuk ka arritur të shënojë gol në shtatë paraqitjet e tij në Premierligë. Pavarësisht kësaj, francezi thotë se nuk shqetësohet as për shumën e paguar për transferimin e tij dhe as për krahasimet me yllin egjiptian.
“Para së gjithash, nuk kam qenë unë ai që e ka vendosur shumën e transferimit, prandaj kjo nuk është përgjegjësia ime. Sa i përket Mohamed Salahut, ai është legjendë e këtij klubi. Ka bërë gjëra të jashtëzakonshme dhe kam respekt të madh për të. Por, kjo nuk më krijon presion”, tha Barcola.
“Unë nuk jam Mohamed Salah. Do të përpiqem të jap kontributin tim për klubin dhe të lë gjurmën time në historinë e tij. Nuk ndiej presion nga kjo”, deklaroi Barcola për “Sky Sports”.
Barcola beson se paraqitjet e tij do të përmirësohen
Sulmuesi francez, i cili ishte objektivi kryesor i Liverpoolit për më shumë se një vit, pranon se ende nuk e ka treguar potencialin e tij të plotë.
Edhe pse ka hasur vështirësi në fillim të aventurës në Angli, Barcola realizoi het-trik ndaj skuadrës austriake LASK në Ligën e Kampionëve muajin e kaluar, ndërsa më pas regjistroi edhe dy asistime të para me fanellën e Liverpoolit.
Ai beson se me kalimin e kohës dhe me krijimin e një harmonie më të madhe me bashkëlojtarët, paraqitjet e tij do të jenë edhe më të mira.
“Ende nuk jam në nivelin tim më të mirë. Nuk e keni parë ende versionin më të mirë të Bradley Barcolas. Po punojmë së bashku me bashkëlojtarët që ata të përfitojnë sa më shumë nga cilësitë e mia. Besoj se, sapo të krijojmë një mirëkuptim më të madh në fushë, gjërat do të përmirësohen ndjeshëm. Gjithçka po shkon gjithnjë e më mirë dhe bashkëlojtarët po e kuptojnë më mirë stilin tim të lojës”, përfundoi francezi.
Burimi: RTKLive