Javët e para në palestër shpesh përcaktojnë nëse stërvitja do të kthehet në një rutinë të përhershme apo nëse anëtarësimi do të mbetet i papërdorur.
Shumica e problemeve nuk vijnë nga mungesa e përkushtimit, por nga disa gabime të zakonshme që mund të korrigjohen lehtësisht.
Shumë njerëz e nisin palestrën me motivim të madh dhe dëshirën për të parë rezultate sa më shpejt.
Foto ilustruese
Megjithatë, pikërisht kjo shpesh çon në lodhje të tepërt, dhimbje muskulore dhe lëndime, duke bërë që pas pak ditësh të humbasin edhe vullnetin për të vazhduar.
Këto janë gjashtë gabimet më të shpeshta që duhet t’i shmangin fillestarët:
1. Stërvitja e tepërt që në fillim
Të stërviteni çdo ditë deri në rraskapitje gjatë javës së parë mund të duket si një fillim i mirë, por trupi nuk është mësuar ende me një ngarkesë të tillë.
Kjo mund të shkaktojë dhimbje të forta muskulore, lodhje dhe humbje të motivimit.
Më mirë është të filloni me dy ose tri seanca stërvitore në javë dhe ta rritni gradualisht intensitetin, në mënyrë që trupi të ketë kohë të përshtatet.
2. Anashkalimi i nxehjes së muskujve
Muskujt dhe nyjat që nuk janë përgatitur për aktivitet fizik janë më të rrezikuar nga tendosjet dhe lëndimet.
Disa minuta aktivitet i lehtë kardio, si ecja në shirit ose ngasja e biçikletës statike, të shoqëruara me lëvizje rrethore të shpatullave, ijeve dhe nyjave, ndihmojnë në përgatitjen e trupit.
Edhe pse zgjat pak, nxehja mund të parandalojë lëndime që mund t’ju detyrojnë të ndërprisni stërvitjen për disa javë.
3. Përdorimi i peshave të rënda në vend të teknikës së duhur
Një nga gabimet më të shpeshta është ngritja e peshave më të rënda vetëm për të mos mbetur prapa personave të tjerë në palestër.
Kur pesha është më e madhe sesa mund të përballoni, trupi fillon të kompensojë lëvizjen, duke zhvendosur ngarkesën te shpina, shpatullat ose gjunjët, në vend që të punojnë muskujt që synoni të stërvitni.
Prandaj, është më mirë të filloni me pesha më të lehta, të mësoni teknikën e saktë dhe vetëm më pas të rrisni gradualisht ngarkesën.
4. Stërvitja pa një plan të qartë
Kalimi nga një pajisje në tjetrën pa një qëllim të caktuar mund të humbë kohë dhe të sjellë rezultate të dobëta.
Para se të shkoni në palestër, është e rëndësishme të dini se cilat ushtrime do të bëni, sa seri dhe sa përsëritje do të realizoni.
Plani nuk ka nevojë të jetë i ndërlikuar, por duhet të përfshijë të gjitha grupet kryesore muskulore dhe të ndiqet në mënyrë të vazhdueshme.
5. Përqendrimi vetëm në një lloj ushtrimi
Disa fillestarë kalojnë orë të tëra në shiritin e vrapimit, ndërsa të tjerë përqendrohen vetëm te ushtrimet për barkun ose krahët.
Për një trup të balancuar dhe kondicion më të mirë fizik, nevojitet kombinimi i ushtrimeve të forcës me aktivitetet kardio.
Gjithashtu, duhet të përfshihen ushtrime për këmbët, shpinën dhe muskujt e trungut, të cilat shpesh neglizhohen.
6. Neglizhimi i pushimit dhe rikuperimit
Muskujt nuk zhvillohen gjatë stërvitjes, por gjatë periudhës së rikuperimit.
Mungesa e gjumit, ditëve të pushimit dhe vakteve të rregullta mund ta ngadalësojë përparimin dhe të rrisë rrezikun e lëndimeve.
Pushimi është pjesë e rëndësishme e procesit të stërvitjes dhe nuk duhet parë si humbje kohe.
Nëse nuk jeni të sigurt se si kryhet një ushtrim, është mirë të kërkoni ndihmën e trajnerit në palestër.
Disa minuta udhëzime mund t’ju ndihmojnë të shmangni krijimin e zakoneve të gabuara që më vonë janë të vështira për t’u korrigjuar.
Ndërkaq, personat me sëmundje kronike, probleme me zemrën ose lëndime të mëparshme duhet të konsultohen me mjekun përpara se të fillojnë një program të ri stërvitjeje. /Telegrafi/