Presidenti amerikan Donald Trump u takua me ekipin e tij të sigurisë kombëtare për të diskutuar mbi mundësinë e rifillimit të operacioneve ushtarake kundër Iranit, konfirmuan zyrtarë të lartë amerikanë për Fox News.
Sipas tyre, takimet u zhvilluan në Shtëpinë e Bardhë të mërkurën dhe të enjten. Zyrtarët vunë në dukje gjithashtu se të hënën, më 9 nëntor, në Lindjen e Mesme do të ketë hënë të re. Kjo do të thotë se gjatë natës nuk do të ketë pothuajse fare dritë hëne — kushte këto të favorshme për kryerjen e operacioneve ushtarake.
Më herët të enjten, Trump u tha gazetarëve në Zyrën Ovale se Uashingtoni do të marrë një vendim në lidhje me vazhdimin e konfliktit.
“A duam të vazhdojmë me sulme për të siguruar që programi bërthamor i Iranit të shkatërrohet dhe që kjo të mos ndodhë më kurrë?” pyeti Trump, duke shtuar:
“Do të preferoja të mos e shkatërroja pjesën tjetër të vendit, nëse është e mundur, por mund të më duhet ta bëj. Do ta merrni vesh së shpejti.”
Komanda Qendrore e SHBA-së (CENTCOM) po finalizon përgatitjet për mundësinë e rifillimit të operacioneve të mëdha në Iran, ndonëse ende nuk ka marrë një direktivë të re nga Uashingtoni, raporton Fox News, duke iu referuar Axios-it, i cili citon një zyrtar amerikan.
Gjatë një bisede telefonike të enjten, kryeministri irakian Ali Faleh Al-Zaidi i tha Trumpit se territori irakian nuk duhet të përdoret për sulme kundër vendeve fqinje.
“Kryeministri rikonfirmoi qëndrimin e Irakut, i cili bën thirrje për respektimin e sovranitetit të shteteve dhe për të siguruar që territori i tij të mos përdoret si bazë për agresion kundër vendeve fqinje,” thuhet në një njoftim nga zyra e kryeministrit irakian, të publikuar në platformën X.
Sinjali – aty ku e vërteta flet para lajmit!
Burimi: Sinjali