Presidenti amerikan, Donald Trump, ka deklaruar se Irani është “praktikisht i mposhtur ushtarakisht”, duke theksuar se ka përparim pozitiv në negociatat për t’i dhënë fund konfliktit në Lindjen e Mesme.
“Ne po e mbajmë situatën në gjendjen aktuale. Dhe këtë po e bëjmë kryesisht me kërkesë të vendeve fqinje të Iranit”, tha Trump të hënën, gjatë një deklarate për gazetarët në Shtëpinë e Bardhë.
Ai bëri të ditur se mundësia e rifillimit të sulmeve amerikane ndaj Iranit është “shumë e vogël”, por paralajmëroi se ushtria amerikane është e gatshme të veprojë nëse rrethanat ndryshojnë.
“Jemi të gatshëm dhe në pozicion luftarak”, deklaroi presidenti amerikan.
Zyrtarët iranianë kanë shprehur vazhdimisht dyshime lidhur me deklaratat e mëparshme të Trumpit për mundësinë e zgjidhjes së konfliktit.
Nuk është hera e parë që Trump deklaron se lufta me Iranin ka përfunduar nga pikëpamja ushtarake, por këtë herë rrethanat politike janë të ndryshme.
Presidenti amerikan ka lënë të kuptohet se synon uljen e tensioneve me Iranin, pas rezultateve të dobëta të republikanëve në zgjedhjet e mesmandatit javën e kaluar. Disa figura të larta të partisë, përfshirë zëvendëspresidentin JD Vance, ia kanë atribuar këto rezultate edhe luftës me Iranin.
Para zgjedhjeve, Trump kishte deklaruar se forcat amerikane kishin kryer atë që ai e përshkroi si “sulme të vogla” në një ishull iranian në Ngushticën e Hormuzit.
Megjithatë, në një intervistë për emisionin “60 Minutes”, të transmetuar të dielën, ai tha se aktualisht nuk sheh “asnjë arsye” për ta përshkallëzuar më tej konfliktin.
I pyetur se pse nuk e shpall zyrtarisht përfundimin e luftës, Trump tha se disa nga aleatët e SHBA-së në Gjirin Persik mund të përballen ende me sulme iraniane.
“Kemi disa aleatë të shkëlqyeshëm atje dhe duhet të sigurohemi që ata të mos pësojnë dëme”, tha ai.
Trump la të kuptohet se bllokada detare amerikane ndaj porteve iraniane po ndihmon në rritjen e sigurisë në rajon.
Ndërkohë, çmimet globale të naftës, të cilat kishin rënë ndjeshëm pas zgjedhjeve të mesmandatit në SHBA, shënuan një tjetër rënie pas deklaratave të presidentit amerikan.
Të martën pasdite, sipas kohës në Azi, nafta Brent u tregtua me 91.50 dollarë për fuçi, duke shënuar rënie prej më shumë se një për qind. Ndërsa nafta amerikane WTI ra për 1.2 për qind, në 85.82 dollarë për fuçi.
Trump priti të hënën në Zyrën Ovale kryeministrin e Katarit, Sheikh Mohammed bin Abdulrahman Al Thani, me të cilin diskutoi negociatat për përfundimin e luftës.
Presidenti amerikan e cilësoi takimin si një “bisedë të shkëlqyeshme”.
Ndërkaq, në një postim në platformën X, kryeministri i Katarit tha se kishte zhvilluar “diskutime pozitive” me Trumpin dhe zëvendëspresidentin JD Vance për arritjen e një marrëveshjeje dhe vendosjen e paqes në rajon.
Përpjekjet për ndërmjetësimin e paqes mes Uashingtonit dhe Teheranit janë zhvilluar kryesisht në mënyrë indirekte, përmes ndërmjetësuesve, që nga shpërthimi i luftës pas sulmeve të përbashkëta amerikano-izraelite në shkurt.
Arabia Saudite, Katari dhe Emiratet e Bashkuara Arabe janë ndër aleatët e SHBA-së në Gjirin Persik që janë goditur nga sulmet iraniane gjatë luftës. Këto sulme, si dhe kërcënimet për sulme të tjera, kanë shkaktuar edhe ndërprerje të mëdha në transportin ajror në rajon.
Burimi: Dukagjini