Club Brugge po bëhet gati për një kapitull të ri në historinë e tij, me ndërtimin e një stadiumi modern që pritet të kushtojë rreth 200 milionë euro.
Projekti i ri, për të cilin klubi belg ka punuar për gati dy dekada, parasheh një stadium me kapacitet prej 40,116 ulësesh, të gjitha të mbuluara.
Një video e publikuar në YouTube nga kanali ProBuilds ka prezantuar pamjen e ardhshme të impiantit, duke ofruar një pasqyrë më të qartë të arkitekturës dhe organizimit të tij.
Tribunë gjigante për tifozët më të zjarrtë
Një prej veçorive kryesore të stadiumit do të jetë tribuna veriore, e cila do të ketë kapacitet për rreth 12 mijë spektatorë. Ajo do të ndërtohet si një strukturë e vetme, pa ndarje mes sektorit të poshtëm dhe atij të sipërm, duke krijuar një hapësirë të madhe për tifozët më të zjarrtë të Club Brugge.
Ndryshe nga stadiumi aktual Jan Breydel, impianti i ri do të ketë qoshe të mbyllura dhe tribuna të lidhura në të katër anët. Kjo do t’i japë stadiumit një pamje më kompakte, ndërsa spektatorët do të jenë më afër fushës së lojës.
Arkitektura është menduar edhe për të përmirësuar atmosferën gjatë ndeshjeve. Organizimi i tribunave dhe akustika synojnë që zhurma e tifozëve të përqendrohet brenda stadiumit, duke krijuar një ambient më intensiv për futbollistët dhe spektatorët.
Çati moderne dhe pamje e lirë drejt fushës
Një tjetër element interesant është dizajni i çatisë, e cila do të ndërtohet me një sistem të veçantë që përfshin një unazë të brendshme kompresimi dhe një unazë të jashtme tensioni.
Kjo zgjidhje teknike synon të zvogëlojë lartësinë e përgjithshme të stadiumit, pa penguar pamjen e spektatorëve drejt fushës.
Të gjitha ulëset do të jenë të mbuluara, ndërsa struktura do të mundësojë një shikueshmëri sa më të mirë nga secili sektor.
Ndërtimi nis në vitin 2027, hapja planifikohet për 2029
Club Brugge ka kaluar një proces të gjatë administrativ dhe ligjor për realizimin e këtij projekti. Një prej pengesave të rëndësishme u tejkalua në korrik të vitit 2026, kur u refuzua një ankesë kundër lejes së ndërtimit.
Punimet përgatitore nisën në fund të tetorit, ndërsa ndërtimi kryesor pritet të fillojë në fillim të vitit 2027. Klubi synon që stadiumi të jetë gati në verën e vitit 2029, para fillimit të sezonit 2029/30.
Investimi prej rreth 200 milionë eurosh planifikohet të realizohet pa subvencione shtetërore. Përveç stadiumit, projekti përfshin edhe rregullimin e hapësirave publike dhe të gjelbra, si dhe ambiente të tjera që do të jenë në shërbim të komunitetit lokal.
Me përfundimin e këtij projekti, Club Brugge do të largohet nga stadiumi aktual Jan Breydel dhe do të ketë një impiant të ri, të ndërtuar sipas kërkesave moderne të futbollit dhe me kapacitet për më shumë se 40 mijë tifozë. /Telegrafi/
– YouTube www.youtube.com