Vendasit e kanë nisur mirë takimin dhe kanë kaluar në epërsi në minutën e njëzet, kur Arda Guler ka shënuar një gol të bukur nga gjuajtja e lirë, duke e dërguar topin në këndin e epërm të portës së Belgjikës.
Megjithatë, epërsia e Turqisë ka zgjatur vetëm shtatë minuta. Jeremy Doku ka depërtuar bukur nga krahu i majtë dhe ka asistuar për Kevin De Bruyne, i cili ka shënuar për 1:1.
Belgjika e ka përmbysur rezultatin vetëm tre minuta më vonë. Charles De Ketelaere ka përfituar nga një reagim i dobët i mbrojtjes turke dhe e ka dërguar topin në rrjetë për 2:1.
Në pjesën e dytë, belgët kanë pasur disa mundësi për ta thelluar epërsinë, por portieri turk Ugurcan Cakir ka reaguar mirë në disa raste.
Edhe Turqia e ka kërkuar golin e barazimit, sidomos në minutat e fundit, por portieri belg Senne Lammens i ka ndalur goditjet e Baris Yilmaz dhe Deniz Gul.
Kështu, Belgjika i ka marrë tri pikë të rëndësishme, duke kaluar në vendin e dytë të grupit, para Italisë, e cila ende e kishte ndeshjen kundër Francës për ta zhvilluar të enjten mbrëma.
Në anën tjetër, Turqia e ka regjistruar humbjen e pestë radhazi në këtë edicion të Ligës së Kombeve.
Kjo ishte edhe ndeshja e parë për trajnerin e ri të Turqisë, Sergen Yalcin, i cili e nisi aventurën me humbje. Për më tepër, pozita e Turqisë në Ligën A është tashmë në rrezik serioz.
Burimi: RTKLive