Organizata Botërore e Shëndetësisë (OBSH) ka paralajmëruar për një rritje të ndjeshme të rasteve me infeksione të rrugëve të frymëmarrjes në Gazë, ku situata pritet të përkeqësohet edhe më shumë me ardhjen e dimrit. Kushtet e rënda të jetesës, mbipopullimi dhe përmbytjet e shkaktuara nga reshjet e dendura të shiut po shtojnë rrezikun për shëndetin e palestinezëve të zhvendosur.
Përfaqësuesja e OBSH-së në Territorin e Pushtuar Palestinez, Reinhilde Van De Weerdt, ka bërë të ditur se rastet me infeksione akute të rrugëve të frymëmarrjes janë rritur për 33 mijë krahasuar me të njëjtën periudhë të vitit të kaluar.
“Shifrat tregojnë tashmë përmasat e problemit. Rastet me infeksione akute të rrugëve të frymëmarrjes janë 33 mijë më shumë krahasuar me të njëjtën periudhë të vitit të kaluar”, deklaroi ajo.
Sipas OBSH-së, përhapja e infeksioneve po favorizohet nga kushtet e vështira të jetesës dhe përqendrimi i një numri të madh njerëzish në hapësira gjithnjë e më të kufizuara.
Situata është rënduar edhe nga zgjerimi i kontrollit të ushtrisë izraelite përtej të ashtuquajturës “vijë e verdhë”, e cila përcakton kufirin e vendosur në kuadër të armëpushimit të ndërmjetësuar nga Shtetet e Bashkuara në tetor.
“Kjo do të thotë se njerëzit po jetojnë në kushte edhe më të ngushta, ku viruset përhapen shumë më lehtë nga një person te tjetri”, tha Van De Weerdt.
Aktualisht, infeksionet e rrugëve të frymëmarrjes përbëjnë 11 për qind të të gjitha rasteve për të cilat pacientët kërkojnë ndihmë mjekësore. OBSH-ja paralajmëron se kjo përqindje mund të rritet me uljen e temperaturave, përmbytjet, mbipopullimin e strehimoreve dhe mungesën e ajrosjes së duhur.
“Është tronditëse që vetëm disa ditë me reshje shiu na treguan se çfarë na pret në muajt e ardhshëm. Dimri ende nuk ka filluar plotësisht. Më e keqja është ende përpara”, paralajmëroi përfaqësuesja e OBSH-së.
Sipas të dhënave të organizatës, afro një milion palestinezë të zhvendosur jetojnë në zona të rrezikuara nga përmbytjet, ndërsa rreth 400 mijë prej tyre ndodhen në zona me rrezik jashtëzakonisht të lartë.
Përveç dëmeve në vendstrehime, përmbytjet rrisin rrezikun e ndotjes së ujit, ndërsa uji i grumbulluar krijon kushte të përshtatshme për shumimin e mushkonjave dhe dëmtuesve të tjerë. Lagështia favorizon gjithashtu zhvillimin e mykut dhe baktereve, duke shtuar rrezikun e infeksioneve, veçanërisht te fëmijët e vegjël.
Ndërkohë, OBSH-ja ka bërë të ditur se shumica e barnave po arrijnë të hyjnë në Gazë, por vazhdojnë të ketë vështirësi në sigurimin e pajisjeve dhe materialeve laboratorike, të domosdoshme për diagnostikimin e sëmundjeve dhe përcaktimin e trajtimit të duhur.
“Për të parandaluar shpërthimin e epidemive, bëjmë thirrje që pajisjet laboratorike të lejohen të hyjnë në Gazë pa vonesa, në mënyrë që të shmangim një katastrofë të shëndetit publik, mbi një katastrofë që tashmë ekziston”, përfundoi Van De Weerdt.
Sinjali – aty ku e vërteta flet para lajmit!
Burimi: Sinjali