Presidenti ukrainas, Volodymyr Zelensky, ka ashpërsuar kritikat ndaj kompanisë SpaceX, duke paralajmëruar se kufizimet në shpejtësinë e terminaleve satelitore ushtarake Starshield po ndikojnë drejtpërdrejt në sigurinë e Ukrainës.
Sipas Zelenskyt, terminalet Starshield që operojnë në territoret ukrainase të pushtuara përkohësisht nga Rusia janë kufizuar në një shpejtësi maksimale prej 161 kilometrash në orë gjatë pesë ditëve të fundit. Ai pretendon se kjo masë po pengon kapacitetet ushtarake ukrainase.
Siç raporton Reuters, Ministria e Mbrojtjes e Ukrainës e ka ngritur këtë çështje edhe në nivel institucional me SpaceX, në përpjekje për të adresuar problemin.
“Disa thonë se bëhet fjalë për një problem teknik. Ne nuk besojmë se është kështu”, deklaroi Zelensky në një prononcim të publikuar nga zyra e tij të shtunën.
Ai paralajmëroi se kufizimet në territoret e pushtuara mund të krijojnë përshtypjen se ato nuk i përkasin Ukrainës, duke ngritur shqetësime edhe për implikimet politike të kësaj mase.
Sipas presidentit ukrainas, kufizimet po ua vështirësojnë njësive të mbrojtjes ajrore identifikimin dhe kapjen e dronëve rusë me motor reaktiv, duke i bërë qytetet ukrainase më të ekspozuara ndaj sulmeve.
Nga ana tjetër, SpaceX ka kundërshtuar pretendimet e Zelenskyt, duke mohuar se ka vendosur kufizime të reja apo se ka ndryshuar mënyrën e funksionimit të sistemeve të saj satelitore.
Sinjali – aty ku e vërteta flet para lajmit!
Burimi: Sinjali