Ronaldinho po përgatitet për një rikthim të veçantë në futbollin aktiv, pasi ka zhvilluar stërvitjen e parë me skuadrën italiane Ravenna, ku pritet të luajë në një ndeshje të kampionatit të Serie C.
Legjenda braziliane dhe ish-ylli i Barcelonës, tashmë 46-vjeçar, ka treguar se klasi i tij nuk është zhdukur, ndërsa pamjet nga seanca stërvitore kanë tërhequr vëmendjen në rrjetet sociale.
Ronaldinho iu bashkua Ravennas në qershor si aksionar dhe ambasador i klubit. Në të njëjtën kohë, u bë e ditur se ai kishte nënshkruar edhe si futbollist, me mundësinë që të paraqitej në të paktën një ndeshje të Serie C gjatë këtij sezoni.
Tashmë braziliani ka zgjedhur edhe sfidën në të cilën synon të rikthehet në fushë. Bëhet fjalë për ndeshjen në shtëpi ndaj Forlit, e planifikuar për të dielën.
Për këtë arsye, Ronaldinho ka udhëtuar drejt Italisë dhe ka zhvilluar një seancë stërvitore me skuadrën, e cila mund të jetë e vetmja para paraqitjes së tij të shumëpritur.
Në një video të publikuar fillimisht nga Fabrizio Romano dhe më pas të shpërndarë edhe në llogarinë zyrtare të Ronaldinhos, braziliani shihet duke kontrolluar në mënyrë spektakolare një top të gjatë nga bashkëlojtari i tij.
Edhe pse topi dukej se do t’i kalonte mbi kokë, ish-ylli brazilian reagoi në momentin e fundit, e ndali me këmbën e djathtë dhe e kontrolloi me një lëvizje të vetme, përpara se ta ngrinte sërish drejt bashkëlojtarit.
Pamjet kanë rikujtuar teknikën dhe elegancën që e karakterizuan Ronaldinhon gjatë karrierës së tij, ndërsa tifozët presin ta shohin sërish në fushë, këtë herë me fanellën e Ravennas./Telegrafi/