Shkencëtarët në Kinë kanë zhvilluar një pajisje të veçantë në formën e një krehëri elektrik, e cila synon të luftojë rënien e flokëve dhe të stimulojë rritjen e tyre.
Sistemi, i quajtur “Detangle”, është prezantuar në një studim të publikuar në revistën shkencore “Nature Communications”. Pajisja kombinon stimulimin elektrik me një mekanizëm që mundëson dërgimin e substancave terapeutike në thellësi të lëkurës, pranë folikulave të flokëve.
Sipas studiuesve nga Universiteti Beihang në Pekin, impulset elektrike ndihmojnë në aktivizimin e folikulave, ndërsa teknologjia e integruar mundëson depërtimin më të thellë të molekulave që synojnë trajtimin e rënies së flokëve.
Në eksperimentet e kryera te minjtë me rënie të flokëve të shkaktuar nga testosteroni, rezultatet ishin veçanërisht premtuese. Pas 28 ditësh, kafshët që nuk morën trajtim rigjeneruan vetëm rreth një për qind të flokëve në zonën e rruar.
Ndërkohë, te minjtë që iu nënshtruan vetëm stimulimit elektrik, rritja arriti në rreth 40 për qind. Rezultate edhe më të mira u regjistruan kur pajisja u kombinua me substanca eksperimentale që synojnë stimulimin e enëve të gjakut përreth folikulave dhe pengimin e mekanizmave hormonalë që shkaktojnë tkurrjen e tyre.
Rezultati më i lartë u arrit te kafshët që morën trajtimin e plotë, ku stimulimi elektrik u kombinua me të dyja terapitë eksperimentale. Sipas studiuesve, rigjenerimi i flokëve në këtë grup arriti në rreth 97.85 për qind.
Megjithatë, kjo teknologji është testuar deri më tani vetëm te minjtë. Përpara se të mund të përdoret te njerëzit, nevojiten studime të mëtejshme për të vërtetuar sigurinë dhe efektivitetin e saj.
Nëse rezultatet konfirmohen edhe në provat e ardhshme, krehëri elektrik mund të hapë një rrugë të re për trajtimin e rënies së flokëve dhe tullacërisë.
Sinjali – aty ku e vërteta flet para lajmit!
Burimi: Sinjali