Mediat gjermane japin detaje për aksidentin tragjik ku vdiqën dy të rinj nga Rahoveci

Mediat gjermane japin detaje për aksidentin tragjik ku vdiqën dy të rinj nga Rahoveci

Written by

in

Mediat gjermane japin detaje për aksidentin tragjik ku vdiqën dy të rinj nga Rahoveci

Një aksident i rëndë trafiku ka tronditur mërgatën shqiptare dhe Komunën e Rahovecit, pasi tre persona humbën jetën të dielën pasdite në Gjermani, mes tyre edhe dy të rinj nga Kosova. Ngjarja tragjike ndodhi në rrugën B311, pranë qytetit Erbach, në landin Baden-Württemberg, ku në një përplasje zinxhirorë u përfshinë gjithsej nëntë automjete.

Dy viktimat shqiptare janë identifikuar si Leart Morina nga fshati Sopniq dhe Berhan Zeka nga Pataqani i Poshtëm, të dy nga Komuna e Rahovecit. Lajmin e hidhur për ndarjen e tyre nga jeta e ka konfirmuar edhe kryetari i Komunës së Rahovecit, Smajl Latifi, i cili u ka shprehur ngushëllime të sinqerta familjeve Morina dhe Zeka.

Sipas raportimeve të mediave gjermane, dy drejtuesit e mjeteve, të moshës 18 dhe 19 vjeç, kanë ndërruar jetë menjëherë në vendin e ngjarjes, ndërsa një pasagjer 26-vjeçar ka vdekur disa orë më vonë në spital, duke mos u mbijetuar plagëve të rënda. Po ashtu, nga ky aksident mbetën të lënduar edhe tre persona të tjerë, përfshirë një 26-vjeçare e cila ndodhet në gjendje të rëndë shëndetësore.

Si ndodhi aksidenti tragjik?

Bazuar në hetimet paraprake të autoriteteve gjermane, dyshohet se drejtuesi 18-vjeçar ka humbur kontrollin mbi automjetin gjatë një manovre parakalimi me shpejtësi të lartë. Fillimisht, vetura e tij është përplasur me disa automjete të tjera, për t’u goditur më pas ballë për ballë me një makinë që po lëvizte nga drejtimi i kundërt.

Përplasja ka qenë aq e fuqishme saqë automjetet janë shndërruar në grumbull hekurishtesh. Në vendngjarje kanë ndërhyrë njësite të shumta të policisë, zjarrfikësve dhe emergjencës, ndërsa rruga B311 ka mbetur e bllokuar për qarkullim për më shumë se 20 orë. Policia gjermane po vazhdon hetimet për të zbardhur të gjitha rrethanat e kësaj tragjedie.

Sinjali – aty ku e vërteta flet para lajmit!

/GazetaSinjali/

Burimi: Sinjali