Mbetjet e djegura të pëlhurës në fund të hekurit mund të lënë shenja në rrobat e pastra. Nuk kërkohen produkte të posaçme pastrimi; mjaftojnë soda e bukës dhe uthulla, të cilat shumica e njerëzve i kanë në shtëpi.
Një hekur me fund të djegur konsumon më shumë energji elektrike sepse është më e vështirë të ngrohet, dhe gjurmët nga fundi mund të dëmtojnë përgjithmonë rrobat, shkruan portali britanik Ideal Home , i cili diskutoi këtë temë me ekspertë pastrimi.
Para pastrimit, shkëputeni hekurin nga priza, derdhni ujin nga ena dhe prisni që të ftohet plotësisht dhe të thahet.
«Mos u përpiqni kurrë të pastroni shenjat e djegura nga hekuri ndërsa është ende i lidhur në prizë», paralajmëron Jeremy Barltrop i dyqanit britanik të pajisjeve G Johns & Sons.
Pastë me sodë buke dhe uthull
Për pastrim, do t’ju duhet uthull e bardhë, sodë buke, dy lecka mikrofibre dhe shkopinj pambuku. Përzieni pjesë të barabarta uthull dhe sodë buke për të krijuar një pastë.
Ava Wilson, kryeredaktore e faqes së internetit Unclutterer, e cila ka 25 vjet përvojë në pastrim, thotë se soda e bukës është perfekte për pastrimin e hekurave sepse është paksa gërryese, kështu që heq papastërtinë pa e gërvishtur.
Aplikoni pastën me një leckë në fund të hekurit dhe fërkojeni me lëvizje rrethore, jo me lëvizje të drejta. Nëse njollat janë kokëforta, lëreni për rreth 30 minuta.
Përdorni një shkop veshi për të pastruar pastën nga vrimat e avullit përpara se të thahen, në mënyrë që të mos bllokohen. Në fund, fshijeni pjesën e poshtme të hekurit me një leckë tjetër të pastër dhe të lagur. Nëse shenjat nuk zhduken, përsëriteni procedurën.
Nëse nuk keni sodë buke, mund të përdorni pastë dhëmbësh të bardhë. Aplikojeni në fund të hekurit, lëreni për rreth një minutë dhe pastaj fshijeni.
Si ta parandaloni djegien e hekurit
Mos i hekurosni bluzat me stampa në temperatura të larta ose direkt mbi stampën, pasi kjo mund të dëmtojë si hekurin ashtu edhe rrobat.
Hekurosni së pari pëlhurat që kërkojnë një temperaturë më të ulët, siç janë mëndafshi dhe najloni, dhe pastaj ato që kërkojnë një temperaturë më të lartë. Përndryshe, hekuri mund të mbetet shumë i nxehtë për pëlhurat delikate.
Pastroni hekurin rregullisht, varësisht nga sa e përdorni, nga një herë në muaj deri në një herë në katër muaj, sepse një fund i ndotur dhe vrimat e bllokuara të avullit kontribuojnë në djegie. /Telegrafi/