SHBA miraton shitjen e sistemeve raketore HIMARS për Shqipërinë, paketa kap vlerën e 210 milionë dollarëve

SHBA miraton shitjen e sistemeve raketore HIMARS për Shqipërinë, paketa kap vlerën e 210 milionë dollarëve

Written by

in

SHBA miraton shitjen e sistemeve raketore HIMARS për Shqipërinë, paketa kap vlerën e 210 milionë dollarëve

Departamenti Amerikan i Shtetit ka miratuar shitjen e mundshme të sistemeve raketore HIMARS për Shqipërinë, në një paketë ushtarake me vlerë rreth 210 milionë dollarë. Marrëveshja parashikon blerjen e dy sistemeve M142 HIMARS, së bashku me raketa me precizion të lartë dhe pajisje të tjera mbështetëse, me synimin për të forcuar kapacitetet mbrojtëse të Shqipërisë si vend anëtar i NATO-s.

Sipas të dhënave të publikuara nga Defense Mirror, paketa përfshin gjashtë kontejnerë me raketa M31A2 GMLRS Unitary dhe gjashtë kontejnerë me raketa M30A2 GMLRS Alternative Warhead, si dhe tetë sisteme taktike për drejtimin e artilerisë dhe dy automjete ushtarake Humvee.

Pajisjet e tjera përfshijnë sisteme komunikimi, radio taktike, pajisje navigimi, mjete logjistike, pjesë këmbimi dhe pajisje për mirëmbajtjen e sistemeve. Paketa parashikon gjithashtu trajnim, asistencë teknike dhe mbështetje logjistike.

Financimi i blerjes, me vlerë të parashikuar 210 milionë dollarë, do të realizohet përmes programit amerikan të Financimit Ushtarak të Jashtëm. Kontraktori kryesor për këtë shitje do të jetë kompania amerikane Lockheed Martin.

Sipas Departamentit Amerikan të Shtetit, shitja synon të forcojë sigurinë e një aleati të NATO-s dhe të rrisë aftësinë e Shqipërisë për t’iu përgjigjur kërcënimeve aktuale dhe të ardhshme, duke përmirësuar kapacitetet për goditje me precizion në distanca të gjata.

Zbatimi i programit parashikon gjithashtu udhëtime periodike në Shqipëri të përfaqësuesve të qeverisë amerikane dhe kompanisë kontraktore, për menaxhimin e programit, instalimin e pajisjeve dhe trajnimin e personelit.

Miratimi i Departamentit Amerikan të Shtetit i referohet një shitjeje të mundshme dhe nuk nënkupton se kontrata përfundimtare është nënshkruar apo se sistemet janë dorëzuar.

Burimi: Insajderi