Filli dentar inteligjent mat sheqerin dhe acidin urik: Rezultatet i dërgon drejtpërdrejt në telefon

Filli dentar inteligjent mat sheqerin dhe acidin urik: Rezultatet i dërgon drejtpërdrejt në telefon

Written by

in

Një pajisje e re shfrytëzon lëngun që gjendet mes dhëmbëve për të zbuluar ndryshime në organizëm. Rezultatet e para janë premtuese, por sa e besueshme është kjo metodë?

Gjithnjë e më shumë studime tregojnë se shëndeti i dobët i gojës lidhet me një sërë problemesh shëndetësore, përfshirë demencën, diabetin, goditjen në tru, sëmundjet e zemrës dhe disa lloje të kancerit.

Tani, një pajisje e re për pastrimin e hapësirave ndërmjet dhëmbëve mund të ofrojë një mënyrë për të monitoruar njëkohësisht shëndetin oral dhe metabolizmin e organizmit, pa qenë e nevojshme të shkohet në laborator.

Në një studim paraprak, të publikuar në revistën shkencore Science Advances, matjet e glukozës dhe acidit urik me këtë pajisje treguan përputhje të konsiderueshme me rezultatet e analizave të gjakut.

Si e analizon filli dentar inteligjent lëngun mes dhëmbëve?

Pajisja është zhvilluar nga një ekip shkencëtarësh, i udhëhequr nga bioteknologia Hnin Yin Yin Nyein, në Universitetin e Shkencës dhe Teknologjisë të Hong Kongut (HKUST).

Ajo ngjan me një mjet të zakonshëm për pastrimin e dhëmbëve me fill dentar, por përmban një mekanizëm që mbledh lëngun dhe e drejton drejt një dhome mikrofluidike me biosensorë.

Brenda pak minutash, sensorët matin nivelin e glukozës, acidit urik, peroksidit të hidrogjenit dhe vlerën e pH-së. Rezultatet transmetohen më pas pa tela në telefonin inteligjent.

Lëngu që analizon pajisja nuk është pështymë. Bëhet fjalë për lëngun e brazdës gingivale, i cili gjendet në hapësirat e ngushta ndërmjet dhëmbëve dhe mishrave të tyre.

Për shkak të afërsisë me indet gingivale dhe qarkullimin e gjakut, ky lëng përmban metabolitë, proteina dhe tregues inflamatorë që mund të japin informacione për gjendjen shëndetësore.

Shkencëtarët prej dekadash përpiqen ta shfrytëzojnë këtë lëng për diagnostikimin e sëmundjeve të mishrave të dhëmbëve dhe çrregullimeve të tjera. Megjithatë, mbledhja e tij ka qenë e vështirë për shkak të sasisë shumë të vogël.

Pastrimi me fill dentar mundëson lirimin dhe grumbullimin e një sasie të këtij lëngu, duke e bërë analizimin më praktik.

Pajisja u testua te pjesëmarrës të shëndetshëm, por edhe te persona me diabet, hiperuricemi (nivel të rritur të acidit urik) dhe probleme të shëndetit oral.

Matjet e glukozës treguan lidhje të fortë me vlerat e gjakut, ndërsa rezultatet e acidit urik gjithashtu shfaqën përputhje të rëndësishme.

Përmes matjes së aciditetit dhe peroksidit të hidrogjenit, pajisja mund të ndihmojë edhe në vlerësimin e thellësisë së xhepave gingivalë, një tregues që stomatologët përdorin për diagnostikimin e sëmundjeve periodontale, transmeton Telegrafi.

HKUST

Rezultate premtuese, por nevojiten studime të tjera klinike

Studiuesit besojnë se kjo teknologji mund të krijojë mundësi të reja për monitorimin jo-invaziv të glukozës dhe acidit urik.

Kjo është veçanërisht e rëndësishme për pacientët me diabet, hiperuricemi dhe periodontit, pasi çrregullimet metabolike dhe inflamacioni i mishrave të dhëmbëve mund të ndikojnë negativisht te njëri-tjetri.

Megjithatë, pajisja ende nuk mund të konsiderohet zëvendësuese e analizave të gjakut.

Një kufizim i rëndësishëm është se pothuajse gjysma e lëngut të mbledhur në disa mostra përbëhej nga pështyma, ndërsa në mostra mund të përzihej edhe gjak.

Kur pështyma u analizua veçmas, ajo nuk tregoi informacion të mjaftueshëm për nivelin e glukozës. Prania e gjakut gjithashtu mund të ndikojë në rezultatet e matjeve.

Autorët theksojnë se teknologjia ka nevojë për përmirësime dhe prova klinike më të mëdha, për të vërtetuar saktësinë dhe dobinë e saj në praktikën e përditshme.

Sipas Universitetit të Shkencës dhe Teknologjisë të Hong Kongut, synimi është që një veprim i zakonshëm i higjienës orale të shndërrohet në një mënyrë të thjeshtë për monitorimin e personalizuar të shëndetit.

Nëse studimet e ardhshme i konfirmojnë rezultatet, filli dentar inteligjent mund të bëhet një mjet plotësues në kujdesin ndaj pacientëve me sëmundje metabolike dhe probleme të mishrave të dhëmbëve. /Telegrafi/