Një muaj paraburgim të pandehurit për sulm ndaj personit zyrtar në Gjilan

Një muaj paraburgim të pandehurit për sulm ndaj personit zyrtar në Gjilan

Written by

in

Gjykata Themelore në Gjilan ka aprovuar kërkesën e Prokurorisë Themelore të Gjilanit, duke i caktuar masën e paraburgimit prej 1 (një) muaji të pandehurit S. K. i cili dyshohet për kryerjen e veprës penale sulm ndaj personit zyrtar.

Në njoftim bëhet e ditur se “sipas kërkesës së prokurorisë me datë 17.11.2026, rreth orës 14:00, në Gjilan, rruga ,,Martirët e Gjilanit’’, i pandehuri i ka sulmuar personat zyrtar në kryerjen e detyrave zyrtare, të dëmtuarit Zh. S. dhe R. J. – shpërndarës në Gjykatën Themelore në Gjilan, në atë mënyrë që, derisa të dëmtuarit janë ndalur në lagjen e ,,Zabelit’’ me qëllim të gjetjes së një adrese dhe personit me emër L. K. dhe nga vetura i dëmtuari e ka pyetur të pandehurin nëse e njeh personin L. K.. Në atë moment i pandehuri afrohet tek dera e veturës dhe fillon ta godas me grushte, duke e kapur për bluze dhe duke e goditur me dorën tjetër, nga vetura del i dëmtuari R. i cili tenton ta ndaloj, por e godet edhe të dëmtuarin R. me grusht në kokë dhe largohet, ku i dëmtuari Zh. ka pësuar lëndime të lehta trupore, i cili për shkak të lëndimeve ka kërkuar ndihmë mjekësore në Spitalin e Përgjithshëm në Gjilan – Emergjencë”.

Tutje thuhet se më këto veprime i pandehuri dyshohet të ketë kryer veprën penale sulmi ndaj personit zyrtar, vepër e sanksionuar me Kodin Penal të Republikës së Kosovës (KPRK).

Gjyqtari i procedurës paraprake në Departamentin e Përgjithshëm ka vlerësuar se qëndrojnë arsyet ligjore për caktimin e paraburgimit ndaj të pandehurit, duke i marrë për bazë të gjitha ato që u thanë më lart, ndërsa masat tjera alternative do të ishin të pamjaftueshme për zhvillimin me sukses të procedurës penale.

Palët kanë të drejtën e ankesës ndaj këtij vendimi në Gjykatën e Apelit të Kosovës. /Telegrafi/