
Ka marrë fund shqetësimi i familjes nga fshati Beguncë i Vitisë, pasi 19-vjeçari A.Z, i raportuar i zhdukur nga motra e tij, është paraqitur vetë në Polici. Ai ka deklaruar se gjatë kohës kur familjarët nuk kishin informacione për vendndodhjen e tij, kishte qëndruar te një shok në Ferizaj, mëson Gazeta Sinjali.
Rasti ishte raportuar më 20 nëntor, rreth orës 10:00, nga motra e tij, A.Z, e cila kishte kërkuar ndihmën e Policisë për gjetjen e vëllait.
Sipas deklarimit të saj, A.Z ishte larguar nga shtëpia më 19 nëntor, rreth orës 03:00 të mëngjesit, dhe nuk ishte kthyer më.
Familjarët kishin tentuar ta kontaktonin në telefon, por ai nuk u ishte përgjigjur thirrjeve.
Motra kishte deklaruar se komunikimin e fundit me të e kishte pasur përmes një videotelefonate, në orët e para të 19 nëntorit, kur ai ndodhej në Ferizaj.
Pas denoncimit, Policia kishte njoftuar Prokurorinë e Shtetit dhe kishte iniciuar rastin “Person i zhdukur”.
Megjithatë, të premten, më 20 nëntor, rreth orës 21:45, i riu është paraqitur vetë në Stacionin Policor në Viti.
Ai u ka deklaruar zyrtarëve policorë se gjatë mungesës kishte qëndruar te një shok i tij në Ferizaj.
Pas paraqitjes së tij, Prokuroria është njoftuar për zhvillimet e reja dhe është udhëzuar që rasti të procedohet me raport të veçantë në Prokurorinë Themelore.
Sinjali – aty ku e vërteta flet para lajmit!
Burimi: Sinjali