
Kosova ka kaluar një tjetër 24-orësh të ngarkuar me ngjarje të ndryshme nga kronika e zezë. Armë zjarri dhe municion të konfiskuar, vjedhje, raste të dhunës në familje, arrestime në bazë të urdhëresave gjyqësore dhe një rast i raportuar si zhdukje kanë qenë ndër zhvillimet që shënuan orët e fundit.
Një vdekje nën hetime në Pejë
Në Pejë, një rast i vdekjes është iniciuar si “Hetim i vdekjes”, pasi në trupin e viktimës janë vërejtur plagë, rrethanat e të cilave ende nuk janë sqaruar. Trupi i pajetë është dërguar në Institutin e Mjekësisë Ligjore për obduksion, ndërsa hetuesit po përpiqen të zbulojnë se çfarë ka ndodhur gjatë ndërrimit të natës, kur viktima ndodhej në objektin e fermës. Deri më tani nuk është konfirmuar nëse vdekja ka ardhur si pasojë e një aksidenti, lëndimit në rrethana të tjera apo ndonjë vepre penale.
Dy raste me armë në Podujevë
Në fshatin Dyz të Podujevës janë evidentuar dy raste të ndara që lidhen me armëmbajtjen. Në rastin e parë, një 33-vjeçar është ndaluar pasi është vërejtur me një pushkë gjuetie të tipit “Sarsilmaz” dhe një rrip me 27 fishekë. Ndonëse kishte deklaruar se posedonte leje për armën, ai ka pranuar se nuk i kishte respektuar kushtet e autorizimit. Ndaj tij është iniciuar rast penal, ndërsa është liruar në procedurë të rregullt.
Në rastin tjetër, gjatë një aksioni të përbashkët të Policisë dhe Agjencisë Pyjore, një 24-vjeçari i është gjetur një armë në veturën e tij të tipit Opel. Pas kontrollit në shtëpi, me autorizim të Prokurorisë, janë konfiskuar edhe tri armë të tjera. Edhe ky i dyshuar është liruar në procedurë të rregullt, ndërsa rasti i është kaluar njësisë së hetimeve.
Arrestime për vjedhje dhe urdhëresa gjyqësore
Në Gjakovë, Policia ka arrestuar një person që kërkohej nga drejtësia për vuajtjen e dënimit prej shtatë muajsh burgim për veprën penale “Vjedhja”. Pas arrestimit dhe përfundimit të procedurave në stacionin policor, ai është dërguar në institucionin korrektues.
Ndërkaq, në Lipjan, një 19-vjeçar dyshohet se kishte marrë nga arka e lokalit “Elektrika Mont” rreth 30 deri në 40 euro. Pas largimit nga lokali, ai është gjetur në qytet nga vëllai i ankueses, i cili ka njoftuar Policinë. Gjatë kontrollit, të riut i është gjetur edhe një sasi e vogël e substancës së dyshuar narkotike, e llojit marihuanë, si dhe një brisk i vogël. Me vendim të Prokurorit, ai është ndaluar për 48 orë.
Raste të dhunës në familje në Podujevë dhe Prizren
Një grua nga Llapashtica e Epërme e Podujevës ka denoncuar bashkëshortin për dhunë fizike. Pas ndërhyrjes së Policisë, ajo ka refuzuar vendosjen në strehimore dhe ka kërkuar të largohet së bashku me dy fëmijët te prindërit e saj. Bashkëshorti, 36-vjeçar, është ndaluar për 48 orë, ndërsa gjatë intervistimit ka mohuar se ka ushtruar dhunë.
Një rast tjetër është raportuar në lagjen Arbana të Prizrenit, ku një 43-vjeçar dyshohet se ka kërcënuar bashkëshorten pasi kishte shkuar në shtëpinë e vëllait të saj. Ishte pikërisht kunati ai që e kishte njoftuar Policinë për rastin. Pas intervistimit të palëve dhe konsultimit me Prokurorinë, ndaj të dyshuarit është iniciuar rast për “Dhunë në familje” dhe ai është dërguar në mbajtje.
Pistoletë dhe nëntë fishekë në Prishtinë
Në rrugën “Bahtir Jahiri” në Prishtinë, një 62-vjeçar është ndaluar pasi gjatë kontrollit policor i është gjetur një pistoletë e tipit “Blowing”, së bashku me nëntë fishekë të kalibrit 9 mm. Arma dhe municioni janë sekuestruar, ndërsa me vendim të Prokurorisë, i dyshuari është ndaluar për 48 orë.
Burgim për një gjobë të papaguar në Lipjan
Një 44-vjeçar në Lipjan është arrestuar në bazë të një urdhërese gjyqësore, pasi nuk e kishte paguar gjobën e shqiptuar për veprën penale “Lëndimi i lehtë trupor”. Dënimi me gjobë ishte zëvendësuar me 35 ditë burgim, ndërsa pas arrestimit ai është dërguar në institucionin korrektues.
Zhduket Passati në parkingun nëntokësor në Podujevë
Një 23-vjeçare nga Podujeva ka raportuar se i është zhdukur vetura Volkswagen Passat, të cilën e kishte parkuar në parkingun nëntokësor të marketit “Viva Fresh Store”, në rrugën “Agron Rrahmani”. Ajo kishte deklaruar se e kishte lënë automjetin aty rreth orës 17:00, por kur ishte kthyer për ta marrë, nuk e kishte gjetur. Rasti është raportuar në Polici dhe po hetohet, ndërsa deri më tani nuk raportohet për persona të identifikuar apo të arrestuar.
21-vjeçarja e raportuar e zhdukur gjendet bashkë me foshnjën
Ndërkohë, është sqaruar edhe rasti i një 21-vjeçareje nga Prizreni, e cila ishte raportuar e zhdukur pasi ishte larguar nga shtëpia bashkë me vajzën e saj nëntëmuajshe. Pas veprimeve hetimore, Policia ka arritur ta lokalizojë të renë, ndërsa nga intervistimi është sqaruar se ajo ishte kthyer te bashkëshorti i saj. Për zhvillimet janë njoftuar Prokuroria dhe familjarët.
Këto janë disa nga ngjarjet që u raportuan dhe u trajtuan nga organet e rendit gjatë 24 orëve të fundit, ndërsa hetimet dhe procedurat për rastet përkatëse po vazhdojnë.
SINJALI 24 – Kur ti flije, ne e përcollëm Kosovën.
Shënim: Personat e përmendur në këtë lajm konsiderohen të pafajshëm derisa fajësia e tyre të vërtetohet me vendim të formës së prerë të gjykatës.
Sinjali – aty ku e vërteta flet para lajmit!
Burimi: Sinjali