Presidenti i Serbisë, Aleksandar Vuçiq, ndërhyri në favor të projektit për ndërtimin e një kompleksi me markën Trump në Beograd, sipas një hulumtimi të publikuar të enjten nga gazeta britanike The Guardian.
Sipas raportimit, ndërhyrja lidhet me projektin e planifikuar në vendin ku ndodhej ish-shtabi i ushtrisë jugosllave, një ndërtesë e dëmtuar gjatë bombardimeve të NATO-s më 1999 dhe që ka rëndësi historike në Serbi.
Projekti lidhet me interesat afariste të kompanisë së familjes Trump dhe me Jared Kushnerin, dhëndrin e presidentit amerikan Donald Trump, përmes një marrëveshjeje për zhvillimin e pronës në Beograd.
Sipas The Guardian, hulumtimi mbështetet në dokumente dhe intervista që lidhen me procedurat gjyqësore në Serbi. Çështja ka të bëjë me mënyrën se si u trajtua projekti dhe me ndërhyrjet e pretenduara në procesin e tij.
Projekti ka shkaktuar polemika në Serbi, veçanërisht për shkak të rëndësisë historike të ndërtesës dhe vendimit për ta vënë atë në dispozicion për një zhvillim të ri.
Megjithatë, Vuçiqi nuk është akuzuar në këtë rast, ndërsa ai dhe ministri i Financave, Siniša Mali, kanë mohuar çdo shkelje.
The Guardian ka raportuar se përfaqësuesit e kompanisë së familjes Trump kanë mohuar përfshirjen në negociatat për marrjen e pronës në Beograd, ndërsa përfaqësuesi i Jared Kushnerit ka mohuar se projekti ishte pjesë e ndonjë marrëveshjeje politike. / The Guardian
Burimi: RTKLive