Rreth 500 pjesëtarë nga Kosova dhe Maroku parashihet të përfshihen në misionin ndërkombëtar, por Izraeli nuk po lejon nisjen e ndërtimit të bazës që do ta mbështeste operacionin, shkruan gazeta britanike The Guardian.
Kosova është pjesë e kontingjentit ndërkombëtar të paraparë për stabilizimin e Gazës, por zbatimi i misionit po përballet me pengesa, pasi Izraeli po bllokon ndërtimin e një baze të përkohshme ushtarake, të planifikuar në kuadër të nismës së presidentit amerikan, Donald Trump.
Sipas The Guardian, projekti synon të krijojë një pikë mbështetëse për vendosjen e trupave ndërkombëtare, të cilat do të ndihmonin në krijimin e kushteve të sigurisë për rindërtimin e territorit palestinez.
Baza është planifikuar të strehojë 150 pjesëtarë të forcës ndërkombëtare të stabilizimit, ndërsa një pjesë e kontingjentit më të gjerë prej rreth 500 pjesëtarësh nga Kosova dhe Maroku do të përfshihej në këtë mision.
Kontrata për ndërtimin e bazës iu dha në gusht kompanisë amerikane Arkel International. Megjithatë, sipas burimeve të cituara nga The Guardian, Izraeli nuk ka lejuar hyrjen e kontraktorit dhe të kamionëve me pajisje në Gaza, duke pamundësuar nisjen e punimeve.
Më 30 mars 2026, Qeveria e Kosovës miratoi dërgimin e trupave në Gaza, në kuadër të nismës së mbështetur nga Shtetet e Bashkuara.
Kryeministri Albin Kurti kishte deklaruar se Kosova është e gatshme të kontribuojë për popullin e Gazës, duke përmendur edhe përvojën e vendit nga prania e forcave ndërkombëtare që nga viti 1999.
Numri i saktë i trupave që Kosova do të dërgojë nuk ishte bërë publik në njoftimin e atëhershëm të Qeverisë.
Forca Ndërkombëtare e Stabilizimit është pjesë e planit të administratës amerikane për periudhën pas armëpushimit mes Izraelit dhe Hamasit. Ajo synon të mbështesë sigurinë dhe administrimin kalimtar të Gazës, si dhe të krijojë kushtet për rindërtimin e territorit.
Bllokimi rrezikon zbatimin e planit
Sipas The Guardian, pa funksionalizimin e bazës dhe vendosjen e forcës ndërkombëtare, ekipet e ndërtimit nuk mund të nisin punën për infrastrukturën bazë dhe objektet e nevojshme për popullsinë e Gazës.
Bordi i Paqes, i kryesuar nga Trumpi, më 23 shtator prezantoi një plan gjashtëmujor me vlerë 2.45 miliardë dollarë, si fazë e parë e një programi rindërtimi që parashihet të kushtojë rreth 71 miliardë dollarë gjatë dhjetë vjetëve.
Sipas burimit të cituar nga gazeta, Bordi i Paqes shpreson që projekti të mund të vazhdojë pas zgjedhjeve parlamentare në Izrael, të planifikuara për 27 tetor.
Deri atëherë, pjesëmarrja e Kosovës në misionin ndërkombëtar mbetet pjesë e një plani që ende po përballet me pengesa në terren.
Burimi: RTKLive