Larja e pulës së pagatuar para gatimit është një praktikë e zakonshme, por ekspertët e sigurisë ushqimore paralajmërojnë se ajo mund të rrisë rrezikun e përhapjes së baktereve në kuzhinë.
Sipas Qendrës Amerikane për Kontrollin dhe Parandalimin e Sëmundjeve (CDC), pula e papërpunuar mund të përmbajë baktere që shkaktojnë helmim nga ushqimi, ndaj nuk ka nevojë të lahet para gatimit.
Gjatë larjes, pikat e ujit mund të shpërndajnë bakteret deri në 80 centimetra larg lavamanit, duke ndotur enët, sipërfaqet e punës, ushqimet e tjera dhe dërrasat e prerjes.
Foto: Shutterstock
Një studim i Departamentit Amerikan të Bujqësisë (USDA) tregoi se te 60 për qind e pjesëmarrësve që e lanë pulën, u gjetën baktere në lavaman, ndërsa te 26 për qind bakteret u përhapën edhe te sallata e gatshme për konsum.
As uthulla dhe as lëngu i limonit nuk i eliminojnë bakteret e dëmshme nga pula e pagatuar.
Sipas USDA-së, as shpëlarja dhe as zhytja e mishit në ujë me kripë, uthull apo limon nuk garantojnë sigurinë e tij.
Në vend të larjes, rekomandohet që duart të lahen me sapun për të paktën 20 sekonda para dhe pas prekjes së pulës së papërpunuar.
Gjithashtu, duhet të përdoret një dërrasë e veçantë për prerjen e saj, ndërsa enët, veglat dhe sipërfaqet e kuzhinës duhet të pastrohen me ujë të nxehtë dhe detergjent.
Mënyra më e sigurt për të eliminuar bakteret është gatimi i plotë i pulës, derisa temperatura e brendshme të arrijë 74 gradë Celsius.
Kjo mund të kontrollohet me një termometër ushqimor. Nëse në mish ka ndonjë papastërti që duhet hequr, rekomandohet të fshihet me një letër kuzhine të lagur, e më pas të lahen duart. /Telegrafi/