Për më shumë se gjashtë dekada, Shtetet e Bashkuara të Amerikës kanë ndjekur një politikë të rreptë të heshtjes lidhur me arsenalin bërthamor të Izraelit, duke shmangur me kujdes çdo konfirmim publik se aleati i tyre kryesor në Lindjen e Mesme posedon armë të tilla.
Mirëpo, kjo qasje dekadash po vihet gjithnjë e më shumë në pikëpyetje, ndërsa lufta me Iranin ka rikthyer në mënyrë alarmante vëmendjen te rreziku i përhapjes së armëve të shkatërrimit në masë në rajon.
Izraeli asnjëherë nuk e ka pranuar e as mohuar zyrtarisht posedimin e armëve bërthamore — një strategji e njohur si “paqartësia bërthamore”, e cila i ka mundësuar të ruajë këtë potencial pa pësuar presionin dhe sankcionet ndërkombëtare. Megjithatë, vlerësimet ndërkombëtare sugjerojnë se Izraeli mund të ketë rreth 90 koka bërthamore, me bazë kryesore kompleksin në Dimona, në shkretëtirën e Negevit.
Kjo heshtje tradicionale e Uashingtonit u përplas direkt në Kongresin amerikan gjatë një seance dëgjimore. Ligjvënësi Joaquin Castro pyeti drejtpërdrejt Sekretarin amerikan të Shtetit, Marco Rubio, se a posedon Izraeli armë bërthamore.
Rubio shmangu konfirmimin zyrtar, por pranoi se sipas vlerësimeve globale Izraeli i posedon ato, duke shtuar se vetë shteti izraelit nuk e ka pohuar kurrë publikisht këtë fakt.
Nga ana tjetër, Castro paralajmëroi se mbajtja e kësaj politike po bëhet gjithnjë e më e rrezikshme në kushtet e konfliktit me Iranin, pasi opinioni publik dhe faktori ndërkombëtar nuk i dinë vijat e kuqe të Izraelit për përdorimin e mundshëm të tyre.
Situata ndërlikohet edhe më tej me frikën se vendet e tjera të rajonit, si Arabia Saudite, mund të futen në garë bërthamore nëse Irani arrin të sigurojë armë të tilla. Tashmë mbetet pikëpyetje nëse SHBA-ja do të arrijë të ruajë këtë tabu 60-vjeçare apo do të detyrohet të ndryshojë qëndrim përballë krizës në Lindjen e Mesme.
Sinjali – aty ku e vërteta flet para lajmit!
Burimi: Sinjali