Dhjetë gazetarë të televizionit N1 në Serbi kanë dhënë dorëheqje, duke akuzuar drejtuesit e rinj të mediumit për censurë, manipulim dhe ndërhyrje në pavarësinë editoriale, vetëm pak ditë para zgjedhjeve parlamentare në këtë vend.
Largimi i tyre ka nxitur reagimin e gazetares së njohur ndërkombëtare, Christiane Amanpour, e cila ka shprehur shqetësimin për gjendjen e lirisë së shtypit në Serbi.
“Një moment shqetësues për lirinë e shtypit në Serbi, pikërisht para zgjedhjeve. Një shtyp i lirë dhe i pavarur duhet të jetë i panegociueshëm në çdo demokraci”, ka shkruar Amanpour në platformën X.
Sipas raportimeve, dhjetë gazetarët kanë dorëzuar një letër të përbashkët drejtuar menaxhmentit, në të cilën kanë renditur një sërë akuzash për mënyrën e drejtimit të televizionit pas ndryshimeve në pronësi dhe menaxhim.
“Nën menaxhmentin e ri, kemi qenë dëshmitarë të pavërtetave, manipulimeve, censurës së fshehtë, diskreditimit publik të kolegëve, margjinalizimit të tyre profesional, fyerjeve dhe poshtërimeve, ndryshimeve të redaktorëve të programeve dhe refuzimit për të zhvilluar diskutime të hapura për problemet”, thuhet në letrën e tyre.
Gazetarët kanë akuzuar gjithashtu drejtuesit e televizionit se po krijojnë një përshtypje të rreme të debatit publik, ndërkohë që, sipas tyre, dialogu i mirëfilltë brenda redaksisë është eliminuar.
Ata kanë kundërshtuar atë që e përshkruajnë si përpjekje për të krijuar barazi artificiale mes aktorëve politikë, duke anashkaluar kontekstin politik dhe trajtimin që autoritetet serbe i kanë bërë televizionit N1 ndër vite.
“Pikërisht sepse Serbia po përballet me zgjedhjet më të paparashikueshme që nga themelimi i N1, ne refuzojmë, në këto rrethana, t’i japim legjitimitet një politike editoriale që nuk mund ta mbështesim”, kanë deklaruar gazetarët.
Sipas tyre, kufizimet e vendosura nga menaxhmenti i ri e kanë bërë të pamundur qëndrimin në televizion pa cenuar parimet e tyre profesionale.
N1 ka qenë për vite me radhë një nga televizionet kryesore në Serbi që ka raportuar në mënyrë kritike për qeverinë dhe presidentin Aleksandar Vuçiq.
Në maj, sipas informacioneve të publikuara, kompania mëmë e televizionit u shit te European Future Media Investments, me seli në Luksemburg, e menaxhuar nga Alpac Capital.
Kjo kompani kishte blerë më herët edhe Euronews, në vitin 2022. Një hulumtim i gazetarëve të Direkt36 dhe Le Monde kishte raportuar se blerja ishte financuar pjesërisht nga kapital shtetëror hungarez dhe kompani të lidhura me rrjetin politik të kryeministrit të Hungarisë, Viktor Orbán.
Dorëheqjet vijnë në prag të zgjedhjeve parlamentare të 25 tetorit në Serbi, në një periudhë kur roli i mediave dhe pavarësia e tyre editoriale janë veçanërisht të rëndësishme për informimin e publikut.
Redaksia e N1 ka konfirmuar largimin e dhjetë gazetarëve, duke shprehur keqardhje për vendimin e tyre dhe duke deklaruar se do të vazhdojë të mbrojë parimet profesionale dhe pavarësinë e raportimit.
The GeoPost
Burimi: Dukagjini