Komandanti i Policisë së Kosovës për rajonin e Mitrovicës, Ahmet Xhosha, ka pritur sot pjesëtarët e gjeneratës së 63-të të Policisë së Kosovës, në mesin e të cilëve janë edhe dy emra me një histori të veçantë familjare. Bëhet fjalë për Sokol Zymerin, djalin e heroit Enver Zymeri, dhe Jetlum Bunjakun, djalin e heroit Afrim Bunjaku, të cilët kanë zgjedhur të ndjekin rrugën e baballarëve të tyre, duke iu bashkuar Policisë së Kosovës.
Enver Zymeri ra në krye të detyrës në korrik të vitit 2011, gjatë një operacioni policor në veri të Kosovës, ndërsa Afrim Bunjaku u vra më 24 shtator 2023, gjatë sulmit të armatosur ndaj Policisë së Kosovës në Banjskë të Zveçanit.
Të dy janë shpallur heronj të Kosovës për sakrificën e tyre në shërbim të vendit.
Prania e djemve të tyre në gjeneratën e re të Policisë së Kosovës shënon vazhdimësinë e një tradite familjare të shërbimit në institucionin ku baballarët e tyre humbën jetën gjatë kryerjes së detyrës.
Pritja e organizuar nga komandanti Ahmet Xhosha për gjeneratën e 63-të ka sjellë në vëmendje edhe historinë e dy policëve të rënë, emrat e të cilëve mbeten të lidhur me ngjarjet e sigurisë në veri të vendit.
Sinjali – aty ku e vërteta flet para lajmit!
Burimi: Sinjali