Dogana e Kosovës ka realizuar kontrolle në tri argjendari në Prishtinë, në kuadër të aktiviteteve për luftimin e kontrabandës dhe tregtisë së paligjshme.
Gjatë kontrolleve, në njërën prej argjendarive është zbuluar dhe konfiskuar një sasi prej 952.54 gramësh ari të përpunuar, me vlerë të përafërt prej 120 mijë eurosh.
Ndërkaq, në një argjendari tjetër është konstatuar prania e rreth pesë kilogramëve ari të pashenjëzuar, pa vulat përkatëse të kontrollit dhe shenjëzimit.
Lidhur me këtë rast, Dogana ka kërkuar asistencën e Inspektoratit kompetent të Ministrisë së Industrisë, Ndërmarrësisë dhe Tregtisë (MINT).
Inspektorët përkatës kanë marrë në trajtim sasinë e identifikuar të arit, me qëllim të kryerjes së procedurave të verifikimit dhe shenjëzimit, në përputhje me legjislacionin në fuqi.
Dogana e Kosovës ka bërë të ditur se kontrollet e tilla do të vazhdojnë edhe në të ardhmen, me qëllim të parandalimit të kontrabandës dhe mbrojtjes së tregut, konsumatorëve dhe interesave ekonomike e fiskale të vendit.
Sinjali – aty ku e vërteta flet para lajmit!
Burimi: Sinjali