Kombëtarja shqiptare do të ketë mbështetje të madhe nga tifozët në përballjen e rëndësishme ndaj Finlandës, e cila do të zhvillohet të enjten në stadiumin “Air Albania”.
Federata Shqiptare e Futbollit (FSHF) ka konfirmuar të martën se të gjitha biletat për këtë takim janë shitur, duke bërë që tribunat e stadiumit të jenë të mbushura në mbështetje të kuqezinjve.
Përballja me Finlandën ka rëndësi të veçantë për skuadrën shqiptare, e cila synon të ruajë pozitën e parë në grup dhe të bëjë një hap të rëndësishëm drejt ngjitjes në Ligën B të Ligës së Kombeve.
Pas duelit në Tiranë, të besuarit e Kombëtares do të udhëtojnë drejt Budapestit, ku tri ditë më vonë do të përballen me Bjellorusinë në terren neutral.
Shqipëria aktualisht kryeson grupin me nëntë pikë, ndërsa dy sfidat e mbetura pritet të jenë përcaktuese për renditjen përfundimtare dhe objektivin e kuqezinjve për t’u promovuar në një nivel më të lartë të garës.
Burimi: Dukagjini