Ish-këshilltari i Trumpit ngre alarmin për armët dhe fuqitë bërthamore: Nuk jemi gati

Ish-këshilltari i Trumpit ngre alarmin për armët dhe fuqitë bërthamore: Nuk jemi gati

Written by

in

Ish-këshilltari për Siguri Kombëtare i presidentit amerikan Donald Trump, John Bolton, ka paralajmëruar se bota po përballet me një realitet të ri dhe të rrezikshëm bërthamor.

Në një intervistë për NewsNation, pas takimit trepalësh mes presidentit amerikan Donald Trump, presidentit rus Vladimir Putin dhe atij kinez Xi Jinping në Kinë, Bolton shprehu shqetësimin për ndryshimin e ekuilibrit të fuqive bërthamore.

Sipas tij, skadimi i traktatit New START, i cili kufizonte arsenalet strategjike bërthamore të SHBA-së dhe Rusisë, ka krijuar sfida të reja për sigurinë ndërkombëtare.

Bolton përmendi se SHBA-ja dhe Rusia kanë secila nga 1,550 armë bërthamore të dislokueshme, ndërsa Kina zotëron rreth 600 armë bërthamore.

“Ne tashmë jemi pothuajse në një botë bërthamore me tri pole dhe nuk jemi të përgatitur për këtë”, paralajmëroi Bolton.

Ai theksoi se fuqizimi i arsenalit bërthamor të Kinës po ndryshon ekuilibrin strategjik global, duke e bërë më të ndërlikuar situatën e sigurisë për Shtetet e Bashkuara.

Për këtë arsye, ish-këshilltari amerikan kërkoi që Pentagoni ta trajtojë këtë çështje si një nga prioritetet kryesore strategjike.

Përveç kërcënimit bërthamor, Bolton ngriti shqetësime edhe për bashkëpunimin e mundshëm mes Rusisë, Kinës dhe Iranit.

Ai iu referua raportimeve sipas të cilave Moska dhe Pekini dyshohet se i kanë ofruar Teheranit informacione të inteligjencës për të ndihmuar në sulmet ndaj bazave ushtarake dhe anijeve luftarake amerikane.

Sipas Boltonit, presidenti Trump duhet t’u kërkojë drejtpërdrejt udhëheqësve të Rusisë dhe Kinës që të ndërpresin çdo mbështetje të tillë për Iranin.

Deklaratat e tij vijnë pas takimit të 19 nëntorit në Shenzhen të Kinës, ku Trump, Putin dhe Xi Jinping zhvilluan bisedime për çështje të sigurisë dhe marrëdhënieve ndërkombëtare.

Bolton ishte kritik edhe ndaj rezultateve të këtij takimi, duke vlerësuar se ai nuk prodhoi pothuajse asnjë rezultat konkret, pavarësisht rëndësisë së tij diplomatike. /Telegrafi/