Kryeredaktori i televizionit proqeveritar serb Informer, Dragan J. Vuçiqeviq, ndërpreu programin për të reaguar ndaj lajmit se Komisioni i Lartë i Prokurorisë Publike po shqyrton rrethanat e mosparaburgimit të Milan Radoiçiqit pas sulmit terrorisdt në Banjskë të Kosovës.
Lajmi i publikuar nga portali Nova se rasti kundër biznesmenit kontrovers Milan Radoiçiq, njeriu kryesor për organizimin e sulmit të armatosur në Banjskë, është nën shqyrtimin e Komisionit të Lartë të Prokurorisë Publike, shkaktoi reagim të menjëhershëm në televizionin Informer.
Kryeredaktori i këtij mediumi, Dragan J. Vuçiqeviq, e ndërpreu programin për të lexuar lajmin, të cilin e cilësoi si tronditës.
Ai më pas e interpretoi shqyrtimin e rastit si një përpjekje për arrestimin e Radoiçiqit, duke e paraqitur atë si hero serb.
“Në thelb, më lejoni ta përkthej në serbisht – ata duan ta arrestojnë heroin serb, Milan Radoiçiqin. Sot të gjithë jemi Milan Radoiçiq. Sot e arrestojnë atë, nesër do të na arrestojnë ne”, deklaroi Vuçiqeviq.
Në reagimin e tij ndërhyri edhe zëvendësi Dejan Vukeliq, i cili pretendoi se zhvillimet përbëjnë një shenjë të qartë se Kosova po njihet.
Sipas Nova, Komisioni i Lartë i Prokurorisë Publike, i përbërë nga pesë anëtarë, po shqyrton edhe vendimin përmes të cilit Radoiçiq nuk u dërgua në paraburgim pas marrjes në pyetje në Prokurorinë e Lartë Publike në Beograd, lidhur me konfliktin e armatosur në Banjskë.
Vëmendje e veçantë po i kushtohet rrethanave në të cilat nuk u kërkua paraburgimi i tij, pavarësisht seriozitetit të veprave për të cilat dyshohet.
Portali serb, Nova kishte raportuar më herët se prokurori Nikola Panteliq, i cili ndërkohë është avancuar në pozitën e kryeprokurorit në Prokurorinë e Lartë Publike në Pançevë, në propozimin për paraburgimin e Radoiçiqit kishte përmendur vetëm rrezikun e arratisjes si rrethanë që mund të pengonte procedurën.
Sipas këtij raportimi, prokurori nuk ishte mbështetur në tri rrethanat e tjera që mund të justifikonin paraburgimin: rrezikun e përsëritjes së veprës penale, ndikimin e mundshëm te dëshmitarët dhe shqetësimin e publikut. Pse këto rrethana nuk ishin përfshirë në kërkesën për paraburgim pritet të jetë gjithashtu pjesë e shqyrtimit nga Komisioni.
Radoiçiqi dhe sulmi në Banjskë
Pas sulmit të armatosur në Banjskë, më 24 shtator 2023, Milan Radoiçiq mori përgjegjësinë për organizimin e grupit të armatosur.
Pas marrjes në pyetje në Prokurorinë e Lartë Publike në Beograd, prokurori kishte kërkuar që ndaj tij të caktohej masa e paraburgimit deri në 30 ditë.
Në kërkesë ishte përmendur edhe fakti se Radoiçiq herë pas here qëndronte jashtë vendbanimit të tij për më shumë se 90 ditë, pa e raportuar këtë.
Tashmë, shqyrtimi i vendimit për mosparaburgimin e tij ka nxitur reagime në mediat proqeveritare serbe, ku Vuçiqeviq e paraqiti këtë zhvillim si një kërcënim jo vetëm ndaj Radoiçiqit, por edhe ndaj të tjerëve që e mbështesin atë.
Kosova e ka akuzuar Serbinë se qëndron prapa sulmit, ndërsa Beogradi zyrtar i ka mohuar këto akuza.
Nga 45 personat e akuzuar nga drejtësia e Kosovës për sulmin në Banjskë, tre janë dënuar. Të akuzuarit e tjerë, përfshirë Radoiçiqin, vazhdojnë të jenë në arrati dhe besohet se ndodhen në Serbi.
Kosova ka lëshuar disa fletarrestime ndaj Radoiçiqit, i cili është nën sanksione të Shteteve të Bashkuara dhe Britanisë së Madhe për lidhje me krimin e organizuar ndërkombëtar./TheGeoPost
Burimi: Dukagjini