Një arritje me peshë të madhe dhe një faqe e re është shkruar sot për gjinekologjinë dhe të gjithë sektorin publik të shëndetësisë në Kosovë. Në Klinikën e Gjinekologjisë dhe Obstetrikës në QKUK është realizuar me sukses lindja e parë me prerje cezariane nga një shtatzëni e arritur përmes fertilizimit të asistuar (IVF) brenda këtij institucioni publik.
Lajmi u bë i ditur nga drejtori i kësaj klinike, Zef Ndrejaj.
Ndrejaj shprehu kënaqësinë e arritjes së këtij rezultati, duke thënë se ky moment nuk është thjesht një procedurë e suksesshme mjekësore, por një dëshmi e qartë se shërbimi i IVF-së në sektorin publik po konsolidohet dhe po u ofron shpresë të re të gjitha çifteve që përballen me sfidën e infertilitetit.
Përmes një deklarate, mjekët që morën pjesë në këtë proces historik shprehën emocionin dhe rëndësinë e kësaj ngjarjeje për vendin:
“Sot pata kënaqësinë dhe nderin që, së bashku me kolegët e mi të Klinikës së Gjinekologjisë dhe Obstetrikës në QKUK, të realizojmë lindjen e parë me prerje cezariane të një pacienteje, shtatzënia e së cilës ishte arritur përmes procedurave të fertilizimit të asistuar (IVF) në sektorin publik të shëndetësisë në Kosovë”, deklaroi ai.
Mjekët theksuan se ky rezultat reflekton përkushtimin e vazhdueshëm të të gjithë stafit mjekësor dhe hap perspektiva të reja për mjekësinë kosovare:
“Ky moment shënon një arritje të rëndësishme dhe një dëshmi konkrete të punës, përkushtimit dhe profesionalizmit të stafit tonë. Njëkohësisht, dëshmon se shërbimi i IVF-së në Klinikën tonë po konsolidohet, po zhvillohet dhe ka një të ardhme premtuese.”
Ky sukses institucional pritet të lehtësojë barrën financiare dhe emocionale për shumë familje kosovare, duke vërtetuar se edhe në spitalet publike mund të ndërtohen e ofrohen shërbime të standardeve më të larta mjekësore.
Burimi: Sinjali