Një skemë e mirëmenduar mashtrimi me fondet e sigurimeve shëndetësore dhe shoqërore ka vënë në shënjestër të drejtësisë gjermane një familje me origjinë nga Kosova, e cila menaxhonte disa ndërmarrje në sektorin e ndërtimit.
Sipas dyshimeve të ngritura nga organet e hetimit, skema funksiononte përmes pajisjes së punëtorëve me vërtetime të rreme mjekësore për paaftësi në punë. Pavarësisht se zyrtarisht figuronin në pushim mjekësor, punonjësit vazhdonin aktivitetin e rregullt në kantiere, duke u mundësuar kompanive të përfitonin jashtëligjshëm shuma të mëdha parash nga skemat shtetërore.
Në këtë veprimtari të paligjshme dyshohet se janë përfshirë edhe dy mjekë vendas, të moshës 74 dhe 72 vjeç. Hetimet tregojnë se njëri prej tyre merrte një shpërblim prej 250 eurosh për çdo raport mjekësor të lëshuar pa bazë reale.
Dëshmitë e grumbulluara nga ish-punonjësit zbulojnë se kartelat shëndetësore grumbulloheshin përpara nisjes së orarit të punës, ndërsa punëtorët dërgoheshin te mjekët për të marrë dokumentacionin e nevojshëm e më pas ktheheshin menjëhatë në punëtori.
Lidhur me rastin, autoritetet e prokurorisë kanë ngritur tashmë aktakuzë ndaj pronarëve të kompanive dhe dy mjekëve të përfshirë. Përballja gjyqësore pritet të startojë gjatë ditëve në vijim, ndërsa të akuzuarit gëzojnë prezumimin e pafajësisë deri në marrjen e një vendimi të prerë nga gjykata.
Sinjali – aty ku e vërteta flet para lajmit!
Burimi: Sinjali