Zonja e parë e Shteteve të Bashkuara të Amerikës, Melania Trump, ka siguruar një armëpushim mes Rusisë dhe Ukrainës në qytetin e Oleshkyt, i cili kontrollohet nga forcat ruse. Sipas njoftimit të Shtëpisë së Bardhë, armëpushimi pritet të hyjë në fuqi më 29 tetor.
Qyteti, i vendosur në jug të Ukrainës dhe i pushtuar nga forcat ruse që nga shkurti i vitit 2022, po përballet me një krizë gjithnjë e më të rëndë ushqimore, për të cilën kanë raportuar banorët.
“Të dyja palët kanë rënë dakord të ndalojnë përkohësisht të gjitha veprimet ushtarake në Oleshky, për të mundësuar hyrjen e ndihmave humanitare dhe për të përgatitur evakuimin e civilëve përmes një korridori të sigurt”, thuhet në deklaratën e Shtëpisë së Bardhë.
Sipas njoftimit, armëpushimi do t’u mundësojë ekipeve civile nga të dyja vendet të veprojnë në zonë. Procesi do të dokumentohet nga një organizatë mediatike amerikane, bëri të ditur Melania Trump.
Njoftimi vjen në një kohë kur presidenti amerikan, Donald Trump, po ushtron presion ndaj presidentit ukrainas, Volodymyr Zelensky, për të arritur një marrëveshje me presidentin rus, Vladimir Putin, me synimin për t’i dhënë fund luftës.
Ndërkohë, Melania Trump është angazhuar edhe në përpjekjet për ribashkimin me familjet e tyre të fëmijëve ukrainas që janë dërguar me forcë në Rusi gjatë luftës.
Sinjali – aty ku e vërteta flet para lajmit!
Burimi: Sinjali