Trajneri i Real Madridit, Jose Mourinho, ka folur për procesin e ndërtimit dhe zhvillimit të skuadrës, duke theksuar se ekipi ka ende shumë për të përmirësuar, si në aspektin individual, ashtu edhe në atë kolektiv.
Trajneri portugez pranoi se është ende herët që skuadra të arrijë nivelin e dëshiruar, pasi ai dhe lojtarët kanë vetëm tre apo katër muaj që punojnë së bashku.
Megjithatë, ai beson se njohja më e mirë e futbollistëve dhe puna e vazhdueshme do ta ndihmojnë ekipin të përparojë gradualisht.
“Ne kemi ende një rrugë të gjatë përpara. Kemi vetëm tre apo katër muaj këtu dhe është e pamundur që tashmë të jemi në nivelin që dëshirojmë. Gjithmonë duhet të përmirësohemi, si individualisht, ashtu edhe kolektivisht”.
“Sa më mirë t’i njoh lojtarët, aq më shumë përgatitje teknike dhe taktike mund të bëjmë. Po ecim hap pas hapi”, deklaroi Mourinho.
Ai theksoi se drejtimi i një klubi si Real Madridi shoqërohet me pritshmëri shumë të larta, diçka që e njeh mirë edhe nga periudha e mëparshme në krye të skuadrës madrilene.
“E kuptoj se te një klub si Real Madridi, kërkesat janë në nivelin maksimal. Nuk kam shumë kohë që jam këtu, por më parë kam kaluar tri vite në këtë klub dhe kjo më mundëson t’i kuptoj plotësisht këto pritshmëri. Megjithatë, nuk duhet të harrojmë se kemi ende shumë punë për të bërë në disa aspekte”, u shpreh ai.
Mourinho foli edhe për rëndësinë e përgatitjes taktike, duke nënvizuar se ajo ndërtohet përmes përvojës, punës së palodhshme dhe njohjes së karakteristikave të secilit futbollist.
Portugezi shtoi se nuk është trajner që i përmbahet me ngulm vetëm një ideje, por është i gatshëm të analizojë situatat dhe të ndryshojë qasjen kur kjo është në të mirë të skuadrës.
“Përgatitja taktike është një proces që ndërtohet përmes përvojës, punës së madhe dhe njohjes së lojtarëve. Siç kam thënë edhe më parë, nuk jam trajner që i përmbahet me kokëfortësi vetëm një këndvështrimi”.
“Jam gjithmonë i hapur ndaj analizave, përpiqem të kuptoj gjëra të ndryshme dhe të gjej zgjidhjet më të mira për ekipin tim. Ka shumë gjëra me të cilat jam i kënaqur, por edhe disa të tjera me të cilat nuk jam. Duhet të vazhdojmë të punojmë”, përfundoi Mourinho. /Telegrafi/