Një histori prekëse po tërheq vëmendjen për mundësitë që teknologjia mund t’u ofrojë personave me sëmundje të rënda neurologjike. Një burrë që kishte humbur aftësinë për të folur për shkak të sëmundjes ALS, tashmë mund të komunikojë sërish me familjen e tij, falë një çipi të vendosur në tru nga kompania Neuralink e Elon Musk.
Sipas historisë që po qarkullon, burri arriti t’i shprehë bashkëshortes së tij fjalët “Të dua”, jo përmes zërit, por përmes mendimeve të tij, të cilat teknologjia arriti t’i përkthejë në komunikim.
Sëmundja ALS, e njohur si skleroza laterale amiotrofike, prek qelizat nervore që kontrollojnë lëvizjet e muskujve dhe me kalimin e kohës mund t’ua pamundësojë pacientëve të folurit dhe lëvizjen.
Çipi i Neuralink-ut synon të interpretojë sinjalet e trurit dhe t’i shndërrojë ato në komanda që mundësojnë komunikimin dhe ndërveprimin me pajisjet digjitale.
Falë kësaj teknologjie, burri raportohet se ka rifituar mundësinë të bëjë telefonata dhe të marrë pjesë në bisedat familjare, duke mos qenë më vetëm dëgjues i komunikimit mes njerëzve të afërt.
Rasti po shihet si një shembull domethënës i potencialit të ndërfaqeve tru-kompjuter, të cilat mund t’u japin një mundësi të re komunikimi personave që kanë humbur aftësinë për të folur.
Sinjali – aty ku e vërteta flet para lajmit!
Burimi: Sinjali