Qershor, 2016. Xhelal Sveçla, atëbotë drejtor i Inspeksionit në Komunën e Prishtinës, jep dorëheqje pas vdekjes së dy fëmijëve në një gropë të mbushur me ujë në lagjen Kolovicë të Prishtinës.
Dhjetë vjet më vonë, një tjetër rast tragjik, vrasja e Arlinda Zekajt në Vitomiricë të Pejës, ka vënë në qendër të vëmendjes përgjegjësinë institucionale për mbrojtjen e qytetarëve.
Kësaj radhe, Sveçla është ministër i Punëve të Brendshme.
IPK evidenton dështimet e Policisë në trajtimin e rasteve të Arlinda Zekajt
Inspektorati Policor i Kosovës (IPK), në gjetjet preliminare për rastin, ka evidentuar dështime në disa nivele të Policisë së Kosovës, përfshirë moszbatimin me kohë të urdhrave për mbrojtje dhe mënyrën e trajtimit të informatave për rrezikun ndaj Zekajt.
Si rezultat, IPK-ja ka rekomanduar suspendimin e 11 zyrtarëve policorë, përfshirë zyrtarë udhëheqës në nivel rajonal e lokal dhe katër hetues të stacionit policor në Pejë.
Përveç zyrtarëve policorë, Këshilli Prokurorial i Kosovës ka suspenduar edhe kryeprokuroren e Prokurorisë Themelore në Pejë, Lumturije Vuçetaj, dhe prokuroren Arlinda Nallbani-Gacaferri, pas rekomandimit të kryeprokurorit të Shtetit, Zejnullah Gashi.
Kujtomë se rasti i vitit 2016, për të cilin Sveçla kishte dhënë dorëheqje, kishte të bënte me vdekjen e dy fëmijëve, 11 dhe 13 vjeç, në një gropë të mbushur me ujë. Atëkohë, ai e kishte lidhur vendimin për dorëheqje me pamundësinë e institucioneve për të parandaluar tragjedinë dhe kishte folur për përgjegjësinë e tij njerëzore.
“Pamundësia jonë për të luftuar deri në fund tërë këtë trashëgimi të tmerrshme që na e la qeverisja e kaluar në Prishtinë, ka shkaktuar vdekjen e këtyre fëmijëve”, kishte shkruar Sveçla në reagimin e tij.
Ai kishte theksuar se, ndonëse nuk ndiente përgjegjësi ligjore, e ndiente atë në aspektin njerëzor.
“Nuk ndjej përgjegjësi ligjore, por njerëzore po. Qoftë edhe si bashkëqytetar i këtyre dy fëmijëve të vegjël. Jeta ime nuk mund të jetë e njëjtë pas këtij rasti”, kishte deklaruar ai.
Dhjetë vjet më vonë, pas vrasjes së Arlinda Zekajt dhe suspendimit të zyrtarëve policorë e prokurorëve për lëshimet e dyshuara në trajtimin e rastit, shtrohet çështja nëse do të ketë edhe përgjegjësi politike.
Deri më tani, mbetet të shihet nëse do të ketë dorëheqje nga ministri Sveçla, siç kishte bërë 10 vjet më parë.
Burimi: Dukagjini