Një kontroll policor brenda lokalit “Redbull” në Mitrovicën e Veriut ka përfunduar me gjetjen e një sasie të dyshuar marihuane në çantën e një personi, ndaj të cilit janë iniciuar procedurat për posedim të paautorizuar të narkotikëve.
Burimet e Gazetës Sinjali bëjnë me dije se bëhet fjalë për Nemanja Savicin, rreth 28-vjeçar, i cili është kontrolluar gjatë një aktiviteti policor në rrugën “Isa Boletini”, mbrëmjen e së premtes, më 30 tetor.
Sipas informacioneve të siguruara nga Sinjali, rreth orës 20:40, njësitë policore kanë zhvilluar një kontroll në lokalin “Redbull”, ku gjatë verifikimeve është kontrolluar edhe çanta e Savicit.
Brenda saj është gjetur një sasi prej 0.63 gramësh substancë të dyshuar marihuanë.
Gjetja ka bërë që rasti të marrë trajtim nga hetuesit policorë, të cilët kanë ndërmarrë procedurat e nevojshme për dokumentimin e substancës së dyshuar narkotike.
Pas intervistimit të Savicit dhe konsultimit me organet kompetente, është vendosur që ai të lirohet në procedurë të rregullt.
Rasti është iniciuar për veprën penale “Posedimi i paautorizuar i narkotikëve, substancave psikotrope ose analoge”.
Hetimet do të vazhdojnë për sqarimin e rrethanave të rastit.
Shënim: Personat e përmendur në këtë lajm konsiderohen të pafajshëm derisa fajësia e tyre të vërtetohet me vendim të formës së prerë të gjykatës.
Sinjali – aty ku e vërteta flet para lajmit!
Burimi: Sinjali